Fernando May, juntúul u éejidatarioil Halach’oe’ tu ya’alaj le domingo 21 ti’ noviembre máaniko’, jéets’ k’a’anan ba’al ti’al u éejidoil le kaaja’, ikil táan u ba’ateltiko’ob ka utsil bo’ota’ak u k’áaxo’ob tumen ti’ kun beetbil Tramo 3 ti’ Tren Maya, ba’ale’ ti’ múuch’tambale’, tu béeykuns u tseliko’ob u j komisil le éejidóo’, F.Y.H., máax ma’ patal úuchik u bo’otik k’áax ti’ob bini’.
David Rey kun p’áatal tu jeel beey u j komisil u éejidoil Halach’o’, tumen beey úuchik u je’ets’el ka’aj beeta’ab yéeytambal, tu’ux chíikpaj 316 u p’éel yéeyaj u ti’al, tu’ux táakpaj le 497 u túul máaxo’ob táakano’ob te’e áasambleao’, tu’ux xan yéeynaj le waktúul máaxo’ob oka’an ich Consejo de Vigilancia.
“Ti’al u tse’elel jo’olpóope’ táakpajo’on 426 éejidatarios, tu táan le 26 u túul táakmuk’tik ka’ach le máax yaan ka’acho’, yéetel chéen jayp’éel ma’ tu ts’áaj u yéeyajil ti’ mix máak”.
También te puede interesar: Primera victoria para ejido de Halachó, remueven al comisario ejidal
Walkila’ David Rey, p’áat tu jeele’, ku táakmuk’tik éejidatario’ob, ts’o’okole’ yaan u líik’sik u t’anao’ob ti’al u bo’ota’al u k’áaxo’ob je’el bix unaje’, tu’ux ka u’uyak tu beel bajux jach unaj u bo’ota’al tumen.
“Leti’e’ (le j komis tse’elo’) jach táaj tu yéensaj u tojol, ts’o’okole’ tak Fonatur (Fondo Nacional de Fomento al Turismo) tu ya’alaj to’on unaj k líik’sik k t’aan; juntúul ti’ leti’obe’ tu yilaj yaan ba’ax ma’ patal táan u beeta’ali’, ka tu ya’alaj to’on”.
Ka’alikil u yilko’ob ka jeel a’alak ti’ob bajux u tojoltik u k’áaxo’obe’, u meyajilo’ob Tren Mayae’ láayli’ je’elsa’an, tumen leti’obe’ táan u k’áatiko’ob ka u’uya’ak u t’aano’obi’.
“Beyxan táan k jach ts’aatáantik ma’ u táakpajal le j komis ts’o’ok k tseliko’; yéetel abogadose’ yaan k kaxtik ka chíimpolta’ak le bajux unaj u ts’a’abal to’on tumen Fonatur yóok’lal k k’áaxo’ob”, tu ts’ook a’alaj.
Le 27 ti’ septiembre máaniko’, leti’e’ ka’aj yáax je’elsa’ab u meyajil Tren Maya, te’e k’iino’, tu k’áatajo’ob óoxp’éel ba’al: u tse’elel u j komisil le éejidoo’, u beeta’al túumben p’iisil ti’ bajux ku tojoltik le k’áaxo’obo’ ti’al ka utsik bo’ota’ak ti’ob yéetel u su’utul ti’ob le úuchben maaya nu’ukulo’ob kaxta’ab te’elo’.
Xak'alutskíinsa'an tumen: Sasil Sánchez Chan
