U noj kaajil Cancúne’ tu k’amaj jo’oljeak 1 ti’ diciembree’ 750 u túul u aj meyajilo’ob Batallón de Seguridad Turística táaka’an ich Guardia Nacional, ti’al beyo’, yéetel u meyajo’obe’ u mu’uk’ankúunsiko’ob ma’ u yantal loobilaj te’e kaajo’. mil 445 u túul aj kanano’ob kun meyajo’obe te’e péetlu’umo’: 665 ti’ kun yantalo’ob Playa del Carmen yéetel 750e’ Benito Juárez.
U jo’olpóopil kaaj, Mara Lezama, tu yilaj bix úuchik u k’uchul aj kanano’ob tak tu kúuchil 10 Brigada de la Policía Militar, p’aatal tu kóontinental baantail Isla Mujeres.
“Bejla’e’ k’a’anan k’iin ti’al u kaajil Benito Juárez. U t’aan k jala’ach Andrés Manuel López Obradore’ táan u jaajtal, tumen tu k’a’aytaj u k’ujsa’al Batallón de Seguridad Turística ts’o’okole’ walkila’ ts’o’ok u k’uchul. U tuukulile’ ka béeyak u yantal jets’ óolal tuka’atéen tu kaajil Benito Juárez”, tu ya’alaj.
También te puede interesar: Inicia operaciones en QRoo el Batallón de Seguridad Turística
X jo’olpóope’ tu níib óoltaj tuka’atéen ti’ u jala’achil u lu’umil México, yéetel u mola’ayil noj lu’ume’ tumen tu ts’aatáantajo’ob yéetel múul meyaj, tuláakal le ba’ax k’a’anan ti’al u kaajil Benito Juárez.
“U k’uchul Batallón de Seguridad Turística de la Guardia Nacional yaan u ts’áak u páajtalil u ts’aatáanta’al u kananil kaaj, yéetel u xu’ulsa’al loobilaj ku beeta’al te’e kaaja’, ti’al u chíimpolta’al u páajtalil wíinik (…) Batallóne’ jach kaambanaja’an ti’al u yilik ka yanak jets’ óolal, ts’o’okole’ noj xáak’ab ti’al u mu’uk’ankúunspajal Guardia Nacional, tumen u mola’ayil u ts’áamaj u yóol ti’al u kaláantik kaaj”, beey a’alab ti’ k’a’aytajil ts’íib jóok’sa’ab tumen Guardia Nacional.
Beey túune’, tu súutukil úuchik u t’aanil máax jo’olbesik Seguridad Pública de Quintana Roo, Lucio Hernández Gutiérrez, tu ya’alaj aj kanano’obe’ yaan u mu’uk’ankúunsik’ob kanan te’e tu’ux ku yantal ya’abach aj xíinximbal máako’ob tu chúumukil yéetel tu xamanil Quintana Roo.
Xak'alutskíinsa'an tumen: Sasil Sánchez Chan
