de

del

Foto: Sedetur

TAG Airlines tu ts’áaj k’ajóoltbile’ túumben bej kun káajal u yantal ti’ péepen k’áak’, tu yáax k’iinil diciembre, yéetel le yaan u nup’a’al u noj kaajil Cancún tak Flores, tu baantail u Petenil Guatemala, tu’ux yaan xan u yúuchben kaajil Tikal.

“Túumben beje’ ku nup’ik ka’ap’éel ti’ u noj kaajilo’ob Mundo Maya: Cancún yéetel Flores. Le je’ela’ táan u taal u beeta’al tumen le mola’ayo’ ti’al u kaxtik ka ya’abak meyajo’ob ts’a’aban ti’al kaaj yéetel bix u nup’a’al le kaajo’oba’; ti’ le ts’ook winalo’oba’ TAG Airlinese’ jach ka’anal ikil u ya’abkunsik bej ku je’ik ti’al u baantail u noojolil México”, beey a’alab tumen Julio Gamero, CEO TAG Airlines, ti’ k’a’aytajil tsikbal beeta’ab.

 

También te puede intersar: Anuncian conexión aérea entre Cancún y Flores, en Guatemala

 

Andrés Aguilar Becerril, u meyajnáail Secretaría de Turismo ti’ u péetlu’umil Quintana Roo, tu ya’alaj le túumben beelila’ ku mu’uk’ankúunsik meyaj ku beeta’al ti’al u k’a’amal aj xíinximbalo’ob, ts’o’okole’ noj ba’al ti’al u nu’ukbesajil Mundo Maya beeta’an tu táan uláak’ kaajo’ob.  

Beey túuno’, Darío Flota Ocampo, máax jo’olbesik Consejo de Promoción Turística de Quintana Roo (CPTQ), tu ya’alaj TAG Airlinese’ táan u meyaj ti’al u mu’uk’ankúunsik ba’ax ts’a’aban ti’ kaaj ti’al u xíimbalta’al u Caribeil México.  

Túumben beje’, ku núup’ul yéetel le uláak’ ka’ap’éel ku ts’a’abal k’ajóoltbil tak ma’ seen úuchako’, tu’ux ku páajtal u luk’ul máak tu noj kaajil Guatemala ti’al u bin Cancún yéetel xan Tapachula, Chiapas. Beyxan, ichil u yáax óoxp’éel winalo’ob u ja’abil 2022e’ yaan u káajal u meyaj uláak’ jump’éel bej yaan u nup’ik Guatemala tak Jo’, Yucatán. Tu k’iinil 8 ti’ diciembre kéen je’ebek u bejil péepen k’áak’, lunes tak domingo. 

U baantail Peténe’ ku pakta’al beey u noj kaajil u yúuchben maaya kaaj, tu’ux yaan xan Tikal, je’el bix xan kaláanta’an k’áax asab k’a’anan tu noj lu’umil Guatemala, u petenil Flores yéetel u ja’il Peten.

Xak'alutskíinsa'an tumen: Sasil Sánchez Chan