Tu k’iinil jo’oljeak juevese’ tuláakal le séelularo’ob rejistráarta’an tu lu’umil Yucatáne’ unaj tu k’amajo’ob jump’éel ts’íib ti’al u béeytal u je’ets’el u káajal u k’a’amal Notificaciones Covid Yucatán, jump’éel nu’ukbesaj ku beeta’al ti’al u chan xu’ulsa’al u pa’ak’al le k’oja’anila’, le beetike’ yaan u túuxta’al ts’íib ti’ máax kun yantal naats’ ti’ wa máax tsaayal ti’ le k’oja’ana’.
Ya’abach noj lu’umo’obe’ táan u k’a’abéetkunsik nu’ukbesajo’ob ti’al u tsola’al ti’ kaaj u sajbe’entsil u pa’ak’al u k’oja’anil Covid-19, tumen u ya’alal ti’ tuláakal máak kéen náats’ak yiknal juntúul wa máax tsaayal ti’ le k’oja’ana’ noj meyaj ti’al máaxo’ob táaka’ano’ob ichil u mola’ayil toj óolal.
Notificaciones Covid Yucatán jump’éel meyaj béeykunsa’an úuchik u k’a’abéetkunsa’al Appless, túumben nu’ukbesaj ku yoksa’al tu yáam u muuk’il meyaj Google wa Apple ti’al túun beyo’, yéetel u yáantajil Bluetoothe’ u béeytal u túuxtik jejeláas x ma’ k’aabaili’.
También te puede interesar: Notificaciones Covid Yucatán, busca reducir cadenas de contagio
“Le nu’ukbesaja’ múul beeta’an ichil u jala’achil le noj lu’uma’ yéetel u meyaj Secretaría de Salud (SSY), ti’al u yáantaj u bin u yéemel le beyka’aj u pa’ak’al le k’oja’anila’”, beey tu ya’alaj Rodrigo Solís Pasos, máax beetik u subsekretaryoil Tecnologías de la Información y Comunicaciones.
Le nu’ukla’, tu tsolaj, ku bin u k’e’ek’exik IDS x ma’ k’aabaili’. Kex beyo’, ma’ sajbe’entsili’, ma’ táan u k’a’abéetkunsik mix jump’éel wa ba’ax ka yanak ichil le séelularo’. Yéetel túun Bluetoothe’ ku káajal u k’e’ek’exa’al daatos, óoli’ je’el bix u beeta’al tumen baankos, tumen leti’obe’ óoli’ lalaj 20 minutos u bin u k’exiko’ob.
“Mix juntéen ku túuxta’al mix ba’al yóok’lal u GPSil, mix xan yóok’lal u yuumil le séelularo’. Ma’ xan táan u páajtal u yokol te’e tu’ux ts’a’aban oochelo’ob, u k’aaba’ob uláak’ máak mix tu’ux ku k’a’amal uláak’ ts’íibo’ob; ma’ xan tu yoksikubáaj ti’ bix u meyaj k nu’ukul t’aan”; tu sáasilkuunsaj.
Óoxp’éel bix je’el u je’ets’el u káajal u k’a’amal ts’íib yóok’lal Covid:
Yáaxe’, Apple wa Androide’ ku túuxtiko’ob ts’íib ti’al u tsola’al bix unaj u beetik máak. U ka’ap’éelile’, yéetel jump’éel kodigóo QR, yaan u k’i’itbesa’al tumen u jala’achil le lu’uma’ ti’ reedes sosiaales, ti’al beyo’ u tsola’al xan ba’ax unaj u beeta’ali’. U yóoxp’éelile’, u yokol máak tu kóonfigurasyonil u nu’ukul t’aan, u kaxta’al notificaciones de exposición, u yéeya’al u noj lu’umil yéetel u péetlu’umil máak, tu ts’ooke’ u éejenta’al ba’ax ku k’áata’al ti’al u béeytal u meyaj tu beel.
“Kéen k éejent u páajtal u k’a’amale’, unaj u p’áatal t’aabalil Bluetooth; ts’o’okole’ le je’ela’ yaan u yilik tu’ux yaan uláak’ nu’ukulo’ob t’aan naats’ ti’ yéetel xáanchaja’an kex óoxp’éel minutos múuch’o’ob”, tu tsikbaltaj Solís Pasos.
Wa ka k’uchuk jéets’ek u tsa’ayal ti’ máak Covide’, yaan u yantal u yokol te’e sistema de notificacioneso’ ti’al u páajtal u ya’alik. Te’e súutuk túuno’, le nu’ukul t’aano’ yaan u túuxtik sajbe’entsil te’e séebidoro’obo’ ti’al u káajal u túuxta’al ts’íib ti’ máaxo’ob yanchajo’ob naatsi’ ti’ le wa máaxo’.
Xak'alutskíinsa'an tumen: Sasil Sánchez Chan
