de

del

Foto: Fernando Eloy

Ichil ba’ax j ts’a’ab k’ajóoltbil tumen Mesa para la Construcción de la Paz, táanxel kajil máako’ob túuxta’ab Kaanpech ti’al u ts’a’abal u ju’unil u yantalo’ob te’e noj lu’uma’, ts’o’ok u ch’a’ak bej u bino’ob tak tu xamanil u noj lu’umil México, beey úuchik u ya’alal tumen Aníbal Ostoa Ortega, máax beetik u meyajnáalil Gobierno ti’ u lu’umil Kaanpech, úuchik u beeta’al múuch’tambal tu’ux táakbesa’ab u jo’olpopilo’ob México yéetel jun jaats u aj meyajilo’ob Layda Sansores.

Ichil ba’ax j ts’a’ab k’ajóoltbile’, ojéelta’ab yanchaj kex mil 500 táanxel kajil máako’ob k’ujsa’abob Kaanpech ti’al u jeel ts’a’abal u biisaob; le kun ts’áabilo’ yaan u páajtal u k’a’abéetkunsiko’ob jump’éel ja’ab, tu jo’oloj k’uba’ak ti’ob, ti’al beyo’, u páajtal u máano’ob ichil u noj lu’umil México ich jáalk’abil.

 

También te puede interesar: Migrantes enviados a Campeche ya están camino al norte del país

 

Nook’o’ob yéetel nu’ukulo’ob j ts’a’ab ti’ob ti’al u yutsil yantalo’ob tu kúuchil keetil báaxal Concordiae’ u ch’a’amaj tu máano’ob; kúuchil walkila’ jóojochil. 

Beey túuno’, ikil táan u bin le táanxel kajil máako’oba’, ma’ táan u k’a’abéetkunsa’al u jeel taak’in tumen u mola’ayil Secretaría de Desarrollo Social y Humano (Sedesyh). Ts’o’okole’, ma’ xan ojéela’an wa yaan máax tu k’exaj u tuukul ti’al u máano’ob kajalkaaj, tumen ka’ache’, yanchaj jaytúulo’obe’ tu yóotajo’ob p’áatal México, chéen ba’axe’ ti’ uláak’ péetlu’umo’ob. U ya’abile’ tu ya’alaj u p’áatal Méxicoe’, tu ya’alaj ma’ Kaanpech u k’áato’ob p’áatali’, tumen yaan u kaxtiko’ob tu’ux u meyajtiko’ob ba’ax u yojelo’ob.

Tu ts’ooke’ Ostoa Ortega tu ya’alaje’, ma’ yáax tukulta’an wa yaan u k’áata’al u jeel taak’in u ti’alo’ob, wa ka yanak u k’éexel ba’al ti’ le mola’ayo’obo’, ti’al u páajtal u yáanta’al táaxel kajil máako’ob, ba’ale’ úuchik u yantal tsikbal yéetel x jala’ach Layda Sansores San Román, yéetel uláak’ u meyajnáalilo’ob jala’ache’, je’ets’e’ yaan u beeta’al ba’ax k’a’abéet ti’al u yáanta’alob, chéen ba’axe’ tu’ux ma’ u p’a’atal paachil kaanpechilo’ob.

Xak'alutskíinsa'an tumen: Sasil Sánchez Chan