Ka’alikil táan u ja’abil 2021 yéetel yóok’lal ba’ax úuch yéetel u pak’be’en k’oja’anil Covid-19e’, yanchaj u táanilkúunsa’al no’oja’an xíimbalil yéetel u kananil yóok’ol kaab tumen yukatekoil mola’ayob, beey úuchik u ya’alik Antonio González Blanco, máax jo’olbesik Instituto Yucateco de Emprendedores (IYEM).
Ichil ba’ax tu ya’alaje’, te’e ja’aba’, t’o’oxa’ab tumen le mola’ayo’, óoxp’éel miyoon yéetel uláak’ táanchúmuukil pesos ti’al u yutsil 50 u p’éel mola’ayob yéetel meyajo’ob ku beeta’al Yucatán.
Beyxan, yóok’lal u nu’ukbesajil Activación Empresarial Artesanal, k’a’abéetkunsa’ab jump’éel miyoon 700 mil pesos ti’al u ts’a’abal 350 u p’éel kaambalxook ti’ aj meyajk’abo’ob.
También te puede interesar: Emprendedores yucatecos enfocados en proyectos sustentables: Iyem
Le ja’ab máaniko’, tu ya’alaj, k’a’abéetkunsa’ab 200 miyoonesil pesos ti’al u yutsil mola’ayo’ob talamchaj ba’al ti’ob yóok’lal pak’be’en k’oja’an.
U xaak’alil Estudio sobre la Demografía de los Negocios (EDN) 2020, beeta’ab tumen Instituto Nacional de Estadística y Geografía (INEGI) tu chíikbesaje’ maanal 12 mil úunidadesil mola’ay yanchaj Yucatán. Le je’elo’ ku ye’esike’, kex talamchaj ba’ale’, béeychaj u je’ebel túumben mola’ayob.
Antonio González tu ya’alaj walkila’, mola’ayobe’ táan u meyajtiko’ob uk’be’en yéetel janabe’en ba’al; nook’, ba’ale’ kéen beeta’ake’, ku kaxta’al u k’a’abéetkunsa’al ba’ax ku beetik uts ti’ yóok’ol kaab; ku k’a’abéetkunsa’al ba’alob siijilo’ob te’e lu’uma’, je’el bix u yiits che’. Beyxan ku to’obol yéetel ba’ax séeba’an u ts’úukul.
Ts’o’ok u káajal u yokol tu tuukul le moloa’ayoba’, wa ku k’a’abéetkunsiko’ob no’ojan ba’al ti’al u yutsil xíimbal yéetel ti’al u kaláanta’an yóok’ol kaabe’, ku yúuchul ko’onol tu beel yéetel ku yutsjil pakta’al ba’ax ku beetiko’ob, tu ya’alaj.
Tu ts’ooke’, tu ya’alaje’, ti’al le ja’ab kun okola’ yáan u kaxta’al ka yanak uláak’ ya’abach taak’in ti’al u yúuchul meyaj yéetel ti’al u táakmuk’ta’al mola’ayob te’e péetlu’uma’.
Xak'alutskíinsa'an tumen: Sasil Sánchez Chan
