Nojoch cha’ane’ yaan ka’ach u káajal tu ts’ook k’iinilo’ob ti’ u winalil enero, tak tu yáax k’iinilo’ob febrero, ba’ale’ walkila’ ts’o’ok u je’ets’ele’ ma’ táan u beeta’al tu yóok’lal pak’be’en k’oja’an táan u ka’a piimta’al yóok’lal u jejeláasil Ómicron, ikil séeba’an u páak’al ti’ kaaj.
U jo’olpóopil u kaajil Saki’, Alfredo Fernández Arceo tu ya’alaj cha’an suuk u beeta’al ti’ U Ko’olebil Candelariae’ ma’ táan u beeta’al tumen ma’ no’oja’an yanik ba’al ti’al ka béeyak, tumen je’el wa ka k’uchuk beetbile’, u toj óolal kaaje’ ich sajbe’entsil kun p’áatal.
Kex beyo’, jayp’éel k’iimbesajil ku beetik najil k’uje’ yaan u beeta’al, ba’ale’ yaan u yáax táanilkúunsa’al u kaláanta’al kaaj; chéen leti’e’ cha’an ku páa’ta’al ka béeyak u beeta’al tu ja’abil 2023, wa tumen ts’o’ok u laj p’áatal ma’alobil te’e ja’abo’.
También te puede interesar: Cancelan fiesta a la Virgen de la Candelaria en Valladolid este 2022
Jo’olpóope’ tu páayt’antaj kajnáalo’ob ma’ u beet u báakunrta’alo’obe’, ka u beeto’ob, ti’al u kaláantiko’ob u toj óolal; beyxan k’e’ex u k’iinil u suut paalal kaambal ti’ najilo’ob xook.
Ba’ale’, kúulpach ti’ ba’ax jets’a’ab Saki’e’, tu méek’tankaajil Tizimíne’ táan u cha’anil Reyes Magos, káaj tu yáax k’iinil enero yéetel yaan u ts’o’okol tak tu k’iinil 16; tu k’iinil úuchik u káajal cha’ane’ tu much’ajubáaj maanal ti’ 10 mil u túul máaki’.
Te’e cha’anil xana’, úuch loobilaj. Yanchaj juntúul wíinik sa’at u kuxta’al, le 31 ti’ diciembre máaniko’, úuchik u k’óocha’al ka’alikil táan u beeta’al Báaxal Wakax.
Xak'alutskíinsa'an tumen: Sasil Sánchez Chan
