Lu’umo’ob yaan ichil petenil Yucatáne’ ti’ yaano’ob ichil le yáax jo’op’éel péetlu’umo’ob tu’ux táan u asab piimtal u k’oja’anil Covid-19, beey k’a’ayta’ab tumen Dirección General de Epidemiología ku meyaj tu yáamil Secretaría de Salud ti’ u noj lu’umil México; ts’o’okole’, Quintana Roo yéetel Yucatáne’ ti’ yaan ichil le bulukp’éel péetlu’umo’ob, ichil tuláakal México, tu’ux ts’o’ok u píitmáansa’al u taasail tu’ux yaan máaxo’ob tsaayal ti’ le k’oja’ana’.
Secretaría de Salud ti’ u noj lu’umil Méxicoe’ tu ts’áaj k’ajóoltbil, le 3 ti’ enero máaniko’, u taasa íisidensyail ichil u noj lu’umil México, ti’ u ts’ook kanlajun k’iino’obe’ k’ucha’an tak 36.79 ichil lalaj 100 mil u túul kajnáalo’ob. Chéen tu lu’umil Quintana Rooe’ yanchaj 142.2, le je’ela’ óoli’ kantéen maanal ti’ le meedyao’, ka’alikil ti’ Yucatán k’ucha’an tak 57.23.
También te puede interesar: Península de Yucatán, en el top 5 de crecimiento de casos Covid-19
Bulukp’éel péetlu’umo’ob ichil tuláakal México tu’ux píitmáansa’an u meedyal tuláakal México, tumen u xookile’ k’ucha’an tak 520.23, je’el bix Baja California Sur, yéetel Ciudad de México, yaan 151.89; tu yóox kúuchile’ it’ yaan Quintana Roo tumen xoka’an 142.2, ts’o’okole’ tu paache’ ti’ yaan Baja California, 63.89, San Luis Potosí, 60.92 yéetel Aguascalientes, 57.22.
Tak walkila’, tukulta’an tu péetlu’umil Quintana Rooe’ láayli’ tsaayal ti’ 596 u túul máak le k’oja’ana’, yéetel 4 mil 28 u túul kimen yóok’lal; tu péetlu’umil Yucatáne’ yaan mil 650 u túul máax k’oja’an ti’ Covid-19, yéetel 5 mil 869 kimen yóok’lal, ts’o’okole’ ti’ Kaanpeche’ yaan 469 u túul k’oja’ano’ob yéetel ts’o’ok u kíimil 2 mil 68 u túul máak tumen. U ya’abile’ chika’an ti’ yaan Quintana Roo tumen ti’ yaan xan u ya’abil kajnáalo’obi’.
Beyxan, láayli’ te’e ts’ook péetlu’umila’ tu’ux ku asab je’ets’el leti’e’ k’oja’anil ku tsaayal ti’ máako’, tumen ichil u yalabil u noj lu’umil Méxicoe’ ku jéets’el yóok’ol u 61 por siientoil ichil lalaj 100 mil kajnáalo’obe’, tu péetlu’umil Quintana Rooe’ k’ucha’an tak 355.8 por siiento.
Yucatáne’ ti’ yaan tu ka’a kúuchil ichil le tsoolilo’, tumen xoka’an 282.1 por siientoil, yéetel Kaanpeche’ ti’ yaan tu jo’okúuchil, tumen k’ucha’an tak 176.5 por siientoil.
Xak'alutskíinsa'an tumen: Sasil Sánchez Chan
