Ka’alikil káajak u pak’be’en k’oja’anil Covid-19e’ ts’so’ok u kíimil jump’íit maanal ti’ 2 miyonesil máak, ti’ le je’elo’obo’ 646 mil 451 ku na’ata’al beey píitmáanja’an. Ichil je’elo’obo’, 70 por siientoil (451 mil 864) úuch tumen tsa’ay le k’oja’anil ti’o’, beey úuchik u ts’a’abal k’ajóoltbil ti’ tsool ts’íib beeta’ab yéetel u jets’ ju’unil úuchik u kíimil máak, beyxan u xookil Instituto Nacional de Estadística y Geografía (Inegi) yéetel Secretaría de Salud (Ssa).
Tsoolile’ túumbenkunsa’ab le noviembre máaniko’, ts’o’okole’ chíikpaj ichil u p’isk’iinil 14 tak 20 ti’ le winalo’, u píitmáanil máak ku kíimile’ éem 4.8 por siiento.
También te puede interesar: Campeche, entre los siete estados con exceso de mortalidad
U xak’alta’al xookil beeta’ane’ tu chíikbesaj xan yanchaj 11 u p’éel péetlu’umo’ob, tu’ux táaka’an Ciudad de México, tu’ux ma’ jach táaj ya’abchaj u kíimil máaki’. Le je’ela’ u k’áat u ya’ale’, máaxo’ob kíim ichil u éepidemyolojikail p’iis k’iinil 46e’, táakano’ob ichil le beyka’aj ku páa’ta’al u kíimil máak, wa ku ke’etel yéetel le uláak’ ja’abo’ob ma’ili’ káajak pak’ben k’oja’an.
Le uláak’ lajunp’éel péetlu’umo’ob tu’ux ma’ píitmáanja’an máax ku kíimile’ leti’ le je’elo’oba’: Baja California Sur, Chihuahua, Colima, Hidalgo, Michoacán, Nayarit, Nuevo León, Quintana Roo, San Luis Potosí yéetel Tabasco. Beey túuno’, le ukp’éel tu’ux chíikpaj ya’abchaj máaxo’ob kíim, yóok’lal je’el ba’axake’, leti’ le je’elo’oba’: Aguascalientes, Baja California, Kaanpech, Guanajuato, Morelos, Querétaro yéetel Sonora.
Ichil le tu’ux k’as éem le jaytúul máak xoka’an ku kíimile’ ti’ yaan: Coahuila, Jalisco, estado de México, Veracruz, Yucatán yéetel Zacatecas.
Tsoolts’íibe’ k’i’itbesa’ab tumen Ssae’ ku ya’alik xane’, ti’ uláak’ waxakp’éel péetlu’umo’obe’ xanchaja’an u na’aksa’al beyka’aj máak ku kíimil sáansamal. Leti’ le je’elo’oba’: Chiapas, Durango, Guerrero, Oaxaca, Puebla, Sinaloa, Tamaulipas yéetel Tlaxcala.
Xak'alutskíinsa'an tumen: Sasil Sánchez Chan
