Ka’alikil Quintana Roo yéetel Yucatán suunajo’ob ti’ k’ank’aan sajbe’entsil tumen táan u ka’a piimtal u k’oja’anil Covid-19i’, tu péetlu’umil Kaanpeche’ láayli’ táan u bin u ya’abtal máax ku k’oja’anta’al, beey úuchik u ya’alik Secretaría de Salud del Estado, ba’ale’ kex beyo’ yaan u p’áatal uláak’ ka’ap’éel p’iis k’iinil yéetel u ya’ax boonil tumen ma’ táan u tukulta’al wa je’el u jach talamchajal ba’ali’.
X ts’akyaj Liliana Montejo León, máax jo’olbesik Secretaría de Salud del Estado, tu ya’alaje’ ti’al u béeytal u xóot’ol u beel u pa’ak’al u k’oja’anil Sars-Cov-2 leti’ u béeytal u ts’a’abal ti’ máak u báakunail le Covido’, le beetike’ tu páayt’antaj máaxo’ob ma’ ts’a’abak ti’ob mix jump’éele’ ka u beet u ts’a’abal.
También te puede interesar: A pesar del aumento de casos, Campeche sigue en alerta verde
Beyxan, tu ya’alaje’ jach k’a’anan ma’ u ch’éenel u beeta’al ba’ax ku k’áata’al ti’al u kaláantik máak u tój óolal, je’el bix u p’o’ok mantats’ u k’ab, u k’a’abéetkunsa’al jeel, u ts’áak máak u pixchi’; beyxan tu k’áataj ti’ kaaj ma’ u jóok’ol tu yotoch wa najmal u beetik wa ba’ax táankab, tumen beyo’, ma’ táan u séebtal u páak’al k’oja’an.
Montejo León tu tsikbaltaje’, kex tumen ma’ náach yanik u jejeláasil Ómicron ti’ le péetlu’umo’, tak walkila’ ma’ chíikpajak mix máak ti’ tsaayal ti’ le k’oja’ana’, ba’ale’ kex beyo’, ma’ táan u ch’éenel u kaláanta’al máak je’el bix tak walkila’, tumen le uláak’ u jejeláasil k’oja’anilo’obo’ juntáakalili’ u páak’al ti’ máak
Xak'alutskíinsa'an tumen: Sasil Sánchez Chan
