Rogelio Jiménez Pons ch’éen u jo’olbesik Fondo Nacional de Fomento Turístico (Fonatur), mola’ay k’ubéenta’an ti’ u beetik Tren Maya. Tu jeele’ j ts’a’ab Javier May Rodríguez, máax tu p’ataj xan Secretaría de Bienestar, tu’ux táan u meyaj ka’ach lik’ul u k’iinil 2 ti’ septiembre ti’ u ja’abil 2020.
Jiménez Pons, káaj u jo’olbesik Fonatur tu yáax k’iinil diciembre ti’ u ja’abil 2019, ba’ale’ walkila’, k’e’ex ti’al u beetik u séubsekretaryoil Transportes ti’ u mola’ayil Secretaría de Infraestructura, Comunicaciones y Transportes (SICT), beey úuchik u ts’áak k’ajóoltbil u jala’achil u lu’umil México, ti’ jump’éel k’a’aytajil tsikbal k’i’itbesa’ab le martes máanika’.
May Rodríguez síij tu kaajil Comalcalco, Tabasco. Ma’ili’ ts’a’abak meyaj tu táan Bienestare’, tu beetaj u súubsecretaryoil Planeación, Evaluación y Desarrollo Regional láayli’ ti’ le mola’ayo’, tu’ux tu jo’olbesaj u meyaj u nu’ukbesajil Sembrando Vida.
También te puede interesar: Rogelio Jiménez Pons es relevado como cabeza del Tren Maya
Tu winalil septiembre ti’ u ja’abil 2018e’, ichil LXIV Legislaturae’, tu beetaj u aj jets’ t’aanil México, tu’ux tu chíikbesaj u lu’umil, ka’alikil ti’ yane’, tu k’áataj ka ts’a’abak jayp’éel k’iino’ob ti’ ti’al u páajtal u yokol tu mola’ayil Secretaría de Bienestar. Tu ja’aabil 2001e’ yéeya’ab beey aj pat a’almajt’aan ichil LVII Legislatura ti’ u Congresoil u péetlu’umil Tabasco, tu’ux tu jo’olbesaj Comisión de Asuntos Electorales. Beyxan, tu beetaj ka’atéen u jo’olpóopil u kaajil Comalcalco, Tabasco; yáaxe’ 2007 tak 2009, ts’o’okole’ u ka’atéenile’, 2016 tak 2018.
Beey túuno’, tu winalil octubre máaniko’, ka’aj t’a’an t’aan tu táan Comisión de Comunicaciones y Transportes ti’ Senadoe’, Jiménez Pons tu ya’alaje’ u beeta’al Tren Maya yaan u k’a’abéetkunsik uláak’ 60 mil miyoonesil pesos, tumen ojéela’an tu káajbale’, yaan u tojoltik 140 miyoonesil pesos.
Walkila’ táan u beeta’al tsikbalo’ob yéetel uláak’ u yuumil mola’ayo’ob, ti’al u yila’al tu’ux kun máan u túumben beelil Tren, ichil Cancún yéetel Tulum, tumen táan u kaxta’al ma’ u xáantal ba’al; unaj u ts’o’okol ma’ili’ ch’éenek u beetik u jala’achil López Obrador, ba’ale’ a’alabe’ táan u yila’al ts’o’ok u xantalo’ob kex jo’op’éel winalo’ob ti’ le beyka’aj yáax tukulta’ano’.
Xak'alutskíinsa'an tumen: Sasil Sánchez Chan
