Úuchik u yokol meyaj túumben jala’ach, yéetel úuchik u beeta’al xaak’al ichil u jejeláasil mola’ayobe’, x jala’ach Layda Sansores San Román tu k’ubaj u t’aan ti’al u k’a’aytike’, ichil u yáax winalil u meyaje’, yaan u ya’abkúunsik u náajal aj kanan kaajo’ob; u tuukulile’ ka ts’a’abak 13 mil pesos, ba’ale’ ma’ sáasilkúunsa’al wa lalaj 15 k’iino’ob wa lalaj winal. Ma’ xan je’ets’ ba’ax k’iin kéen káajak u bo’otal beyo’.
Ti’al u ts’o’okbal le ja’ab máaniko’, j ts’a’ab k’ajóoltbil túumben bo’ol yaan u káajal u ts’a’abal ti’al enero, ba’ale’ ti’ jump’éel ts’íib beeta’ab ti’ u Facebookil Sansores San Románe’, k’a’aytabe’ ti’al u ts’o’okbal le winala’ yaan u káajal u chíikpajal le taak’ina’, tu’ux xan tu a’alabe’, tukulta’ab u ya’abkúunsa’al náajal tumen ka’ache’ ma’ táan u chíimpolta’al u meyaj aj kanan kaajo’ob.
También te puede interesar: Aumento salarial a policías campechanos hasta fin de enero: Layda Sansores
Suuka’an “u náajaltiko’ob óoli’ 7 mil pesos, ba’ale’ kéen okok u íimpuestoso’obe’ ku p’áatal ti’ob chéen 5 mil 700 pesos, le je’ela’ ku ye’esike’, ku náajaltiko’ob 11 mil 400 pesos lalaj winalo’ob, ba’ale’ wa jach jaaj in wéet meyajo’ob yaan u káajal u náajaltiko’ob 13 mil pesose’, je’el in suut meyaje’, kex ba’al ti’ máax táan u beetik u jala’achil, wa máax jo’olbesik mola’ay”, tu ya’alaj máax ku meyaj ka’ach Policía Estatal Preventiva (PEP).
Beyxan, leti’e’ tu ya’alaje’, u aj kanan kaajilo’ob bíialidade’ ku náajaltiko’ob ichil 500 yéetel 800 maas jump’íit ti’ juntúul u aj kaanan kaajil PEP, tumen yaanal le meyaj ku beetiko’obo’, maas ma’ sajbe’entsili’. “Lalaj 15 k’iino’obe’, ku náajaltiko’ob ichil 4 mil 900 yéetel 5 mil 200 pesos, ba’ale’ yaan ba’al u yil xan tu’ux jaats meyajil yaano’obi’; ichil Preventiva ma’ táan u béeytal, chéen wa kóomandante máake’, lelo’ je’ele’, ba’ale’ le je’elo’obo’ u nojochilo’ob jaats meyaj yaan”, tu tsolaj.
Walkila’, táan u binetik u k’a’aytal tumen u mola’ayil Secretaría de Administración y Finanzas le k’eexil táan u beeta’ala’.
J kanan kaaj t’aanaje’, ku meyaj ka’ach PEP, ba’ale’ luk’ tu winalil agosto ti’ le ja’ab máaniko’, 15 k’iino’ob u bin ti’al u yokol meyaj u túumben jala’achil le lu’umo’.
Xak'alutskíinsa'an tumen: Sasil Sánchez Chan
