Ichil tsoolil tu’ux yaan u k’aaba’ 362 u túul x meyajo’ob ichnaje’, u 97 por siientoile’ mina’an u kóontratoil meyaj ti’obi’, beey úuchik u chíikpajal ti’ xaak’al beeta’ab tumen u múuch’kabil Jade Sociales Alternativas al Desarrollo, ich múul meyaj yéetel Instituto Municipal de la Mujer.
U 64 por siientoile’ mina’an ti’ Seguridad Social, yéetel u 27 por siientoile’ yaan ti’ob IMSS, 8 por siientoile’ yaan ti’ Seguro Popular – INSABI yéetel u 1 por siientoile’ ISSSTE.
Beyxan te’e xaak’alo’, chíikpaje’ u 7 por siientoile’ beeta’an wa ba’ax loobilajil ti’ ka’alikil táan u meyajo’ob, u ya’abile’ ku ch’a’apachtalo’ob wa ku yoksa’al saajkil ti’ob; u 52 por siientoile’ ku ya’alik u máasewal u ch’i’ibal.
También te puede interesar: En Mérida, 97 por ciento de las trabajadoras domésticas no tiene contrato laboral: estudio
Raquel Aguilera Troncoso, máax beetik u Ejecutivail x jo’olbesajil Jadee’, tu ya’alaj ich múul meyaj beeta’ab yéetel u Instituto, beyxan yéetel Instituto de Liderazgo Simone de Beauvoir, ts’o’ok u je’ets’el jump’éel nu’ukbesaj ti’al u ts’aatáanta’al yéetel ti’al u chíimpolta’al u páajtalil ko’olel beetik le meyajil je’elo’.
Ichil ba’ax ku beetiko’obe’ ti’ yaan u péektsilta’al ichil u yuumil naajo’obe’, ka u ts’íibt u k’aaba’ u x meyajo’obo’ tu táan u mola’ayil Instituto Mexicano de Seguridad Social (IMSS). Le ja’ab máaniko’, ts’a’ab káapasitasyon ti’ 20 u túul x meyajo’ob, beyxan ti’ 10 u túul u yuumil naj, ti’al u ye’esa’al ti’ob bix je’el u ts’íibta’al u k’aaba’obi’.
Tu ja’abil 2019 ka’aj káaj u meyajtiko’ob ba’al yóok’lal le je’ela’, tumen ma’ táaka’an mix ti’ tsikbal ku beeta’al yóok’lal a’almajt’aano’ob yaan ba’al u yil yéetel, ba’ale’ úuchik u beeta’al xaak’al úuchik u yantal u pak’be’en k’oja’anil Covid-19, le beetike’ tu ja’abil 2020e’ káaj u tsikbalta’al uláak’ u jejeláas talamilo’ob ku máansik le x meyajo’obo’.
Xak'alutskíinsa'an tumen: Sasil Sánchez Chan
