de

del

Tulume’, jump’éel u kaajil U Caribeil México jach k’ajóolta’an yóok’lal u jats’utsil yéetel u miatsile’, tu ts’áaj k’ajóoltbil u chíikulal Tesoro Maya, ka’alikil táan Feria Internacional de Turismo de Madrid (Fitur) 2022, ti’al u péektsilta’al miatsil yéetel meyaj táan u beeta’al ti’al u kaláanta’al kuxtal ku yantal te’elo’, ikil u ye’esa’al bix u no’ojan meyajta’al kaab.

Méekt’ankaaje’ táan u chíikbesikubáaj beey pueeblo maajikóo, ichil u cha’anil Fitur, káaj tu k’iinil 19 yéetel yaan u ts’o’okol 23 ti’ enero. Tulume’ k’ajóolta’an beey le lu’um tu’ux ku kili’ichkúunsa’al u Yuumil xunáan kaab, tumen úuchben maayaobe’ ku chíimpoltiko’ob le chan ik’ela’, tumen tu yóok’lalo’ob ku yantal kuxtal.

U mola’ayil Equilibrio Maya, tu’ux ku péektsilta’al u kaláanta’al miatsil yéetel yóok’ol kaabe’, páayt’anta’ab ti’al u chíikbesik Tulum, yéetel kaab ku jóok’sa’al ti’ xunáan kaab.

 

También te puede interesar: La miel melipona de Quintana Roo conquista Madrid

 

U meyajo’obe’ k’aaba’inta’an beey Tesoro Maya, jach no’oja’an u jaanta’al tumen ku mu’uk’ankúunsik u wíinkilal máak, ku beetik u tijil loobilaj tu yoot’el máak, ts’o’okole’ ku luk’sik tak káarnosidad tu yich máak, le beetik ku meyaj beey maaya ts’aak yéetel ma’ séeb u kaxta’ali’.

Luisa Cano, máax chíikbesik Equilibrio Mayae’, tu ya’alaj Tesoro Mayae’ jump’éel chíikulal tu’ux ku meyajta’al u kaabil xunáan kaab, ts’o’okole’ ku kaxta’al u yáanta’al kabnáalo’ob, tumen ku bo’ota’al ti’ob je’el bix unaje’.

“Yéetel maaya kaabe’ yaan k mu’uk’a’an pe’echabrik Europa, tumen jach ma’alo’ob u yila’alo’ob te’elo’”, tu tsikbaltaj, ts’o’okole’ tak u kabnáalilo’ob José María Morelos, Cobá y éetel Felipe Carillo Puerto táaka’anob te’e noj meyaja’, yaan tak u aj xak’al xookilo’ob maaya miatsil.

Ti’al u yojéelta’al uláak’ ba’alo’ob yóok’lale’, ku páajtla u t’aan máak te’ela’ 998 201 7617, wa u xak’alta’al u kúuchil Internet: equilibriomaya.com.

Xak'alutskíinsa'an tumen: Sasil Sánchez Chan