Beatriz Eugenia Gómory Correae’ kulukbal ti’ jump’éel u tu’uk’il meyaj Coparmex Mérida, p’aatal tu baantail García Ginerés. Paachil ti’e’, te’e pak’o’, tak’a’an u yoochel xiibo’ob; ti’ ku káajal u chíikpajal ma’ keet táakbesa’ak ko’oleli’.
Ma’ táan u xáantal kéen u tak’ u yoochel te’elo’ tumen leti’e’ yáax ko’olel kéen u jo’olbes le múuch’il mola’aya’, tu jo’oloj 60 ja’abo’ob yanak te’e péetlu’uma’.
Jump’éel ba’ax ku kaxtik u beetik Gómory Correa ka’alikil táan u meyaj tu táan Coparmex Méridae’, leti’ u béeytal u chíikbesik ko’olel ku meyaj ich mola’ayob, ba’ale’ beyxan u péeksa’al u yóolo’ob yéetel xan ti’al u ts’áak u yóolo’ob ti’al u meyajo’ob ti’ ka’anal kúuchilo’ob meyaj ichil mola’ayo’ob, tumen léeyli’ u kaxta’al xan u beeta¡al u suut taak’in, u kaláanta’al yóok’ol kaab yéetel u kéet yantal wíinik.
U yantal mola’ayob tu’ux ka chíimpolta’ak wíinik
Gómory Correae’ u yojel nojoch kuuch le k’ubéenta’ab ti’o; ma’ chéen ch’a’abili’, ba’ale’ je’el u béeykunsike’. Ma’ sajaki’, yaan u yóol meyaj yéetel u k’áat u k’i’itbes u tuukul ichil máaxo’ob muuch’uolo’ob meyaj te’elo’, yéetel u káajal u táakbesikubáaj ichil poliitikáas yaan ba’al u yil yéetel kaaj, beyxan yéetel talamilo’ob yaan te’e lu’uma’.
“Kexi’ ka yanak uláak’ ko’olel ka u tich’ u k’ab ti’al meyaj kéen u yilo’ob in meyaj. Kexi’ ka yanak ko’olel ka péeknak u yóol yéetel”, tu tsikbaltaj.
Beey ts’o’ok u je’ets’el beey x jo’olbesaje’, leti’e’ ku páa’tik ka béeyak u meyaj ti’al u kéet yantal xiib yéetel ko’olel. Ti’al u suuktal u yila’al yaan ko’olel jo’olbesik nojoch meyajo’ob yéetel mola’ayo’ob. Ma’ ka yanak péektsil wa ku yúuchul.
También te puede interesar: Desarrollo económico a la par del social, objetivo de Coparmex: Beatriz Gómory
“Wa tumen ku yantal wa ba’ax k bin ch’a’anúukt ti’al u yúuchul meyaje’, leti’e’ beyka’aj no’oja’an máak u ti’al, tumen wa beey ka suukchajak u yila’ale’, bejla’a yaan uláak’ ko’olel jo’olbesik nojoch meyajo’ob. Leti’ le ku kaxanpajalo’, ka na’atak ko’olele’ no’oja’an ti’al meyaj je’el bix xiibe’”, tu ya’alaj ich tsikbal tu beetaj yéetel La Jornada Maya.
Beyxan leti’e’ tu ya’alaje’, j ts’a’ab meyaj te’elo’ ma’ chéen tumen ko’oleli’. J ts’a’abe’ tumen no’oja’an u ti’al. Ku tukultik xane’, ma’ u naj u ts’a’abal meyaj ti’ máax chéen tumen xiib wa ko’olel, unaj tumen kaambanaja’an ti’ ba’ax kéen u beet máak.
Xak'alutskíinsa'an tumen: Sasil Sánchez Chan
