Tu jo’oloj ka’ap’éel ja’abe’ (2020-2021), ts’o’ok u ts’a’abal ojéeltbil tu táan u mola’ayil Instituto de Municipal de la Mujer (IMM) 40 u téenal u díijital loobilta’al ko’olel tu noj kaajil Jo’, beey j ts’a’ab k’ajóoltbil tumen Fabiola Josefina García Magaña, máax jo’olbesik le mola’ayo’.
Ti’ le beyka’ajo’, chéen óoxtúul ko’olel ts’o’ok u tak poolo’ob tu táan Fiscalía General del Estado (FGE). Mola’aye’ áantajnaja’an yéetel u leegal tsolnu’ukil yéetel sikolojikoil áantaj.
Beyxan, jayp’éel k’iino’ob paachile’ j ts’a’ab k’ajóoltbile’, ko’olel táakbesa’ab ti’ ba’ax úuch Sororidad Anáhuace’ ts’o’ok u náats’o’ob ti’ u mola’ayil IMM ti’al ka tsolnu’uktako’ob.
También te puede interesar: En dos años el IMM documentó 40 casos de violencia digital en Mérida
“K na’atike’, táan u beeta’al xaak’al tumen Fiscalía General del Estado (FGE), beyxan noj najilo’ob xooke’ u jets’majo’ob je’el u yáantajo’ob ti’ je’el ba’axak ka k’a’abéetchajak, ba’ale’ beyxan ti’al u (je’ets’el) ka yanak mantats’ kananil”, tu ya’alaj jo’olpóop Renán Barrera Concha.
Beey túuno’ García Magaña tu ya’alaje’, ts’o’ok maanal ka’ap’éel ja’ab, ma’ili’ je’ets’ek Ley Olimpia mix xan ts’a’abak u kuuch beey díijital loobilaje’, le mola’ayo’ ts’o’okili’ u káajal u k’amik ko’olel ku mánasik le talamila’, ba’ale’ te’e k’inako’ mina’an a’almajt’aan ts’áak u kuuch máax beetik le k’aasila’.
U nojoch talamil ti’al u ye’esa’al táan u beeta’al le loobilaja’, leti’e’ u mu’uch’ul ba’ax chíikbesik le loobilajo’, tumen yaan k’iine’ ma’ tu chúukpajal, wa le yane’ ma’ tu táakbesa’al beey jaaji’, je’el bix u ch’a’abal u yoochel le páantayao’.
Ti’ ka’ap’éel ja’abe’, tu tsikbaltaj, ts’o’ok u ts’aatáanta’al 40 u túul ko’olel u máansmaj le talamila’. Le ja’ab máaniko’ óoxtúul ko’olel tu beetaj u tak poolil, ts’o’okole’ áantabo’ob ti’al u k’amiko’ob wa ba’ax ka u yutskíins loobilaj beeta’ab ti’ob. Ba’ale’ ichil le je’elo’obo’, chéen yóok’ol juntúul máak jeets’el u beeta’al xaak’al ti’al u je’ets’el, wa ma’, u si’ipil.
Xak'alutskíinsa'an tumen: Sasil Sánchez Chan
