U múuch’kabil meyaj Comisión de Arte y Cultura táaka’an ich Congreso del Estado de Yucatán tu k’amaj yéetel tu éejentaj ka je’ets’ek maayat’aan beey Patrimonio Cultural Intangible para el Estado de Yucatán, úuchik u múul k’áata’al tumen Fracción Legislativa del Partido Acción Nacional (PAN) yéetel u jaats máakilo’ob ti’ Movimiento Regeneración Nacional (Morena), beyxan aj pat a’almajt’aano’ob Alejandra Novelo Segura, Rubí Argelia Be Chan yéetel diputado Rafael Echazarreta Torres.
Ts’o’okole’, ka’aj k’áata’ab ka beeta’ak le jeets’ila’, ku chíimpolta’al tuláakal ba’ax yaan u yil yéetel maayat’aan, u juumil, u ts’íibil, u woojil, u chíikulal wa je’el ba’axak ka u chíikbesik ku taal ti’ u kaajil wa ti’ u miatsil.
U tuukulil le ba’ax táan u k’áata’ale’ leti’ ka yanak u yichil tu táan yóok’ol kaab le t’aana’, le beetik ku páayt’anta’al u yóox jaats meyajil jala’ache’ ka u péektsilt yéetel u mu’uk’ankúuns maayat’aan.
También te puede interesar: Piden declarar la lengua maya como Patrimonio Intangible de Yucatán
Wa tumen ka k’uchuk éejentbile’, jets’t’aane’ yaan u beeta’al tumen Pleno del Congreso, yéetel yaan u yantal u k’a’aytal ich Diario Oficial del Estado de Yucatán; kéen ts’o’okoke’ unaj u káajal u chíimpolta’al jump’éel k’iin tiu jo’oloj je’ets’ek te’elo’.
Tu súutukil úuchik u ts’a’abal k’ajóoltbil le k’áatanila’, u x pat a’almajt’aan PANe’, Manuela de Jesús Cocom Bolio, tu ya’alaj yéetel le je’ela’, táan u páata’al “ka chíikpajak k ch’i’ibalo’ob, tumen k moots’e ti’ u taal ti’ u nojochil máaxo’ob j p’at k’a’anan ba’alo’ob, kex je’el beyka’aj ka máanak k’iino’obe’”.
Leti’e’ ku tukultike’, u béeytal u je’ets’el le je’ela’ ku péeksik ba’al xan tu táan uáak’ máasewal kaajo’ob yéetel miatsilo’ob yaan Latinoamérica, tumen ku kaxta’al u t’óochta’al miatsil yaan tu péetlu’umil Yucatán.
Máax jo’olbesik u múuch’kabil meyaje’, Eduardo Sobrino Sierra, máax táaka’an ich Partido de la Revolución Democrática (PRD), tu tiskbaltaje’ ku táakmuk’tik ba’ax k’áata’ab, “unaj k péektsiltik yéetel k táamuk’tik, ti’al ka jach suukak le maayat’aano’, tumen jach k’a’anan”.
Tu ya’alaj xane’, u péetlu’umil Yucatán bine’ maaya lu’um, le beetik k’a’anan u na’ata’ale’ jach k’a’abéet chíimpolta’al.
Jumpuul úuchik u éejenta’al ba’ax k’áata’abo’, le beetike’ yaan u túuxta’al tu táan Pleno del Congreso del Estado te’e k’iino’ob ku taala’.
Xak'alutskíinsa'an tumen: Sasil Sánchez Chan
