U kajnáalilo’ob Tres Barriose’ béeychaj u p’áatalo’ob tu yotocho’ob ts’o’okole’, úuchik u yantal u k’e’exel u bejil Tren Mayae’ tu péetlu’umil Kaanpeche’, yanchaj uláak’ ya’abach meyaj ti’ 5 mil u túul máako’ob táakano’ob ti’ jejeláas múuch’kabilo’ob, beey úuchik u ya’alik Marco Antonio Sánchez Abnal, máax beetik u meyajnáalil Confederación de Trabajadores de la Construcción (CTC).
Tu tsikbaltaje’, k’eexil yanchaj ti’ u bejil Tren te’e péetlu’umo’ óoli’ je’el bix le ucha’an Yucatán yéetel Quintana Roo, tumen tu noj kaajil Jo’ yéetel Tulume’, tu’ux yanchaj u beeta’al noj k’eexilo’ob ti’al u kaláanta’an úuchben kaajo’ob yéetel ti’al u kaláanta’al kajnáalo’ob naats’ p’áato’ob ti’ le tu’ux ku máan u bejilo’.
“Beey múuch’kabilo’on meyaje’, yaan kex mil 200 u túulal ts’a’aban u kóontratoil ti’al u meyajo’ob te’e Treno’, u ya’abile’ tu jaatsil 2, tu baantail Escárcega tak Calkiní, máaxo’ob xan nuup’ul yéetel uláak’ múuch’kabilo’ob, tumen beyo’ ku je’ebel u joolnajil meyaj ti’ uláak’o’ob, kex tumen ti’ Confederación de Trabajadores de México (CTM) yaan u asab nojochil kóontrato”, tu ya’alaj.
También te puede interesar: Cambio en ruta del Tren Maya en Campeche genera más empleos: Sánchez Abnal
Beyxan, tu ya’alaje’ úuchik u “ch’a’ajolta’al” meyajo’ob Tramo 7e’, ku bin Quintana Roo tak Escárcega, yéetel ku máan tak Calakmule’, tu’ux mina’an u bejil u máan treene’, je’el u beetik u yantal uláak’ meyaj kéen káajak u beeta’al u bejil, tumen te’e baantao’ láayli’ je’elsa’an meyajo’obi’, tumen p’aatal le áamparos ts’a’aban tumen jejeláas múuch’kabilo’ob kaaj.
Sánchez Abnal tu ya’alaje’, leti’e’ chéen u meyajnáalil CTC, le beetike’ chéen táan u páa’tik ka je’ets’ek ba’ax kun úuchul yéetel jiirikóo talamilo’ob yaane’, ti’al u páajtal u t’a’anal máak meyaj tumen Secretaría de Marina, je’el bix úuchik u k’ubéenta’al bin tumen Fondo Nacional de Fomento al Turismo (Fonatur).
Beey túuno’, tu ts’ooke’, tu ya’alaj u múuch’kabil CTCe’ ts’o’ok u béeykunsik mokt’aan yéetel Secretaría del Trabajo y Previsión Social (STPS) Federal, ti’al u káajal u beeta’al áaktbasion fisiikáa yéetel le aj meyajo’obo’, ti’al u chan ma’alobkúunsa’al toj óolal te’e mola’ayo’obo’. Le beetike’, unaj u beeta’al kex jump’éel oora éejersisio ma’ili’ káajak meyaj te’e kúuchilo’obo’.
Xak'alutskíinsa'an tumen: Sasil Sánchez Chan
