Tuláakal máaxo’ob táakpaje’ ichil yéeytambal beeta’ab ich Congreso del Estado de Yucatán, jo’oljeak 16 ti’ febrero, tu jets’ajo’ob ka je’ets’ek maayat’aan beey Patrimonio Cultural Intangible para el Estado de Yucatán; lela’ yaan u chíimpolta’al tu jo’oloj jump’éel k’iin ts’íibta’ak ich Diario Oficial del Gobierno del Estado.
U nooyil ba’ax ku kaxta’al yéetel le je’ela’, leti’ u péektsilta’al yéetel u mu’uk’ankúunsa’al maayat’aan, je’el tu’uxak ka béeyak, le beetik u yóox jaats meyajil jala’ache’ unaj u jach ts’aatáantik le t’aana’ yéetel tuláakal máaxo’ob t’anik.
X pat a’almajt’aan Alejandra Novelo Segura, máax táaka’an ich Partido Movimiento Regeneración Nacional (Morena), tu ya’alaj ba’ax je’ets’e’ jach k’a’anan ti’al le péetlu’uma’ yéetel ti’al máaxo’ob t’anik, tumen “jach ya’abach ja’abo’ob ts’o’ok u máan yéetel káajak u péech’óolta’al u yuumilo’obi’, le beetik táan xan u p’íittal máaxo’ob t’anik”.
También te puede interesar: Declaran la lengua maya Patrimonio Cultural Intangible de Yucatán
Le beetike’, táan u kaxta’al ka yanak uláak’ a’almajt’aano’ob chíimpoltik, péektsiltik yéetel kaláantik, ti’al u p’áatal paachil je’el ba’axak péech’ óolal ka yanak tu yóok’lal, “ba’ale’ unaj k ts’áak k chíimpolal yéetel k táan óolal ti’ máaxo’ob t’anik”.
Beyxan, x pat a’almaj t’aan táaka’an ich Partido Acción Nacional (PAN), Manuela Cocom Bolio, tu ya’alaje’ le ba’ax je’ets’o’ beeta’ab ti’al u mu’uk’ankúunsa’al u t’aan maaya ch’i’ibal, “ko’one’ex péektsilt, tu k’aaba’ Yucatáne’, ba’ax p’ata’an to’on”.
Le 14 ti’ febrero máanika’, Comisión de Arte y Cultura ti’ u Congresoil Yucatáne’ tu éejentaj k’áatan múul beeta’ab tumen u jaats meyajil PAN yéetel Morena, tu’ux k’áata’ab ka chíimpolta’ak maayat’aan yéetel je’el ba’axak e’esik wa chíikbesik u kaajil wa u miatsil.
Xak'alutskíinsa'an tumen: Sasil Sánchez Chan
