Máax jo’olbesik Universidad Autónoma de Yucatán (Uady), José de Jesús Williams, tu jets’aj najil xooke’, ma’ táan u k’áatik ka sa’atbesa’ak u si’ipil yóok’lal ba’ax úuch tak ma’ seen úuchiko’, tu’ux tu ye’esaj p’eekil, saajkil yéetel péech’ óol yóok’ol u xoknáalilo’ob Prepa Uno.
Beyxan, tu ya’alaje’ le ba’ax bin úucho’ ma’ táan u yutstal chéen ichil jun súutuk, mix xan tu jo’oloj wakp’éel winalo’ob tumen “jump’éel ba’al u kanmaj kaaj, ts’o’okole’ lalaj ja’abe’ yaanal bix le xoknáalo’obo’, le beetik unaj ma’ u xóot’ol meyaj yéetelo’obi’”. Tu tsikbaltaj xane’, mantats’ u yúuchul tsikbal yéetel xoknáalo’ob, beyxan múuch’kabilo’ob yaan te’e Uadyo’.
Le 16 ti’ febrero máaniko’, xoknáalo’ob yéetel uláak’ múuch’kabilo’obe’ tu k’áatajo’ob ti’ u jo’olpóopilo’ob Prepa Unoe’, ka yanak u k’áatik tu táan kaaj ka sa’atbesa’ak u si’ipil tumen jach chíikpaj u p’éekil, saajkil yéetel pech’ óol te’e najil xooko’, le 14 ti’ febrero máaniko’, ka’alikil táan u k’iimbesa’al Día del Amor y la Amistad.
También te puede interesar: UADY no se disculpará por caso de homofobia en Prepa Uno, confirma el rector
Uláak’ ba’ale’, tu k’áatajo’ob ka yanak u ka’ansal tuláakal u aj meyajo’ob le najil xooko’, ti’ jejeláas ba’al yaan u yil yéetel diversidad sexogenérica, táakbesajil yéetel u páajatalil wíinik; beyxan ka yanak u je’ets’el ba’ax unaj u beeta’al ti’al u yutsil yantal tuláakal máak te’elo’, yéetel ka u kan máak u tsel jela’an tuukulo’ob jets’a’an yóok’ol máax jela’an ti’ le suuk u yila’alo’.
Tu jo’oloj túun jayp’éel k’iino’obe’, le najil xooko’ tu ts’áaj k’ajóoltbil jump’éel k’a’aytajil ts’íib, tu’ux ku páayt’antik tuláakal máax tu yu’ubaj loobilta’abe’ ka u beeto’ob tak pool tu táan u jo’olpóopilo’ob le najil xooko’; kex beyo’ ma’ tu sáasilkunsaj wa yaan u láaj beeta’al tuláakal ba’ax k’áata’ab tumen xoknáaloo’ob.
Kex tumen tu ya’alaj ma’ táan u kaxta’al u bala’al ba’ax ku yúuchule’, jo’olpóope’ tu tsikbaltaj unaj u na’ata’ale’ namjal u k’éexel u tuukul kaaj, ts’o’okole’ lelo’ ma’ séeb u jáan beeta’ali’. “Kéen okok juntúul paal ti’al u xokik báachiyeratoe’ yaanili’ jela’an tuukulo’ob tu pool, beey túun u káajal u káajal k-áantiko’ob, tumen leti’ kbeelal, tuláakal ba’ax yaan u yil yéetel kaambal”, tu tsikbaltaj.
Xak'alutskíinsa'an tumen: Sasil Sánchez Chan
