Úuchik u léekel ba’ateltambal tumen Moscú tu wak’aj ba’al yóok’ol Ucrania, walkil waxakp’éel k’iino’obe’, ts’o’ok u ka’a yantal ruso-ucranianail tsikbalo’ob le jueves máanika’, tu’ux je’ets’e’ yaan u ts’a’abal u bejil u máan wíinik, ti’al u káajal u jóok’sa’al máak te’elo’; yaan u je’elsa’al le ba’atelilo’ chéen tu k’iinilo’ob kun jets’bilo’ ti’al u páajtal u jóok’sa’al kaaj.
Rusoilo’ob yéetel ucranianoilo’obe’ ka’a kulajo’ob tsikbal ichil bielorrusoil lu’ume’ ti’al u yilko’ob bix je’el u xu’ulul le ba’atelila’, tumen ts’o’ok u jach yantal xwo’okinil tu lu’umil Europa, ts’o’okole’ jach táan u yantal u paklan sakach t’aanil yéetel tak poolil.
Máax tsool xikintik u jala’achil Ucraniae’, Myjailo Podoliak, tu ya’alaj le tsikbal táan u kaxtik ka’acho’ ma’ béeychaj je’el bix tu tukultajo’, le beetik bine’ yaan u kaxtik ka béeyak u yúuchul u yóoxtéen tsikbalilo’obi’.
También te puede interesar: Acuerdan Rusia y Ucrania un alto al fuego temporal para evacuar civiles
"Ku páajtal u ya’alpajale’, ka’alikil táan tsikbalo’obe’ béeychaj u na’atpajal ba’al”, ba’ale’ ichil u yaanalil ba’alo’ob tsikbalta’abe’ “je’el tukulpajo’, Ucraniae’ tu ch’a’aj u súutukil u tukultik yéetel u tsikbaltik ba’al tu kaajil Kiev”, beey úuchik u ya’alik máax jo’olbesik rusoil tsikbal, Vladímir Medinski, máax xan tu ch’a’achibtaj “u talamil u ch’a’ak bej u meyaj Ucrania”.
U ka’apul úuchik u yantal tsikbal ichil Rusia yéetel Ucrania yóok’lal ba’atel táan u yantale’, beeta’ab tu kúuchil Belovezhskaya Pushcha, tu bielorrusail baanta Brest, naats’ ti’ polakail xuul kaaj.
P’el máanik láas 6 tu taal u yáak’abtal te’el baantao’, u wíinikilo’ob ti’ ka’a jaatsil péetlu’umo’obe’ kulaj u tsikbalto’ob ba’ax kun úuchul. Le ya’ax boonil nook’o’obe’ leti’e’ ucranianoilo’obo’, yéetel le u ts’áamaj u wutsul nook’o’obe’ leti’e’ rusoilo’ob’o, beey úuchik u chíikpajal ti’ oochelo’ob k’i’itbesa’ab tumen bielorrusail ajeensya BELTA.
U nooyil ba’ax tsikbalta’abe’, leti’e’ súutuk ti’al u je’elsal le ba’atelo’ yéetel u ts’a’abal u beel u jóok’sa’al máaki’, tumen ya’ab ti’ le kaajo’obo’ ts’o’ok u k’akúunta’alo’ob wa táan u wak’a’al ba’ali’, beey úuchik u ts’íibtik, ma’ili’ káajak múuch’tambal, Mykhailo Podolyak, máax beetik u tsoolnu’ukil u meyaj ucranianoil jala’ach, Volodímir Zelenski.
Rusiae’ táan u k’áatik u “déesmilitarizarta’al yéetel u déesnazificarta’al" Ucrania, je’el bix xan ka chíimpolta’ak u muuk’il u rusail kaaji yóok’ol le yaan ti’ u petenil Crimea, beyxan ka p’áatak jumpáayil reepublikaob yaan tu lak’inil Ucrania, je’el bix xan ma’ u yóotik Ucrania u beet mixba’al yaan u yil yéetel OTAN.
Xak'alutskíinsa'an tumen: Sasil Sánchez Chan
