Féeminista muuk’e’ ku chíikpajal tak ti’ u asab mejenil kaaj yaan ichil u lu’umil Latinoamérica, tumen ko’olele’ ts’o’ok u ti’alintik, le beetik k’a’anan u líik’sik u t’aano’ob ti’al u k’áatiko’ob ka chíimpolta’ak u páajtalilo’ob, beey tu ya’alaj Mina Lucía González, máax táaka’an ichil u féeministail múuch’kab Artesanas de Antigua, Guatemala.
U ya’abil máaxo’ob táaka’an te’e múuch’kabo’, xlo’obayano’ob, ts’o’okole’ tu beetajo’ob líik’sajil t’aan jo’oljeak martes, tu k’íiwikil u noj kaajil Antigua, Guatemala, ti’al u k’a’ajsa’al U K’iinil Ko’olel. Péeksajil yanchaje’, beeta’ab ich jets’ óolal, tu’ux e’esa’ab jejeláas ts’íibil ju’uno’ob.
Tu noj lu’umil Guatemala ko’olele’ “mantats’ u ba’atel, tumen ktukultik le je’ela’ ma’ jump’éel k’iin ti’al u yúuchul k’iimbesaji’, tumen najmal kba’atel yóok’lal kpáajtalilo’ob, tu noj kaajil Antigua, Guatemalae’, tuláakal yéetel mixba’al ku yúuchuli’, tumen ma’ táan u tsikbalta’al ba’ax ku beeta’al chéen ti’al ka k’uchuk máak xíimbali’; láayli’ u seen loobilta’al ko’olel”.
También te puede interesar: La lucha feminista está presente hasta en el pueblo más pequeño: colectivo guatemalteco
Lucía Gonzáleze’ tu ya’alaje’ láaylo’ yaan talamilo’ob te’e kaajo’, je’el bix u seen beeta’al u meyajta’al sexual ba’alo’ob tumen mejen xch’úupalal yéetel xlo’obayano’ob; láayli’ u ko’onol ko’olel ti’al u yantal sexual koonol, ts’o’okole’ máasewal ko’olele’ ma’ táan u cha’abal u koonol jach te’e k’íiwiko’, le beetik xane’ p’íichtaj u náajalo’ob.
“Táan kkaxtik ka xa’aypajak féeminista muuk’, tumen te’e noj kaajo’ ya’abach ba’al ku péek, ba’ale’ unaj u yéets’ta’al óoli’ je’el tu’uxake’, tak tu chan chichanil kaaj te’e yóok’ol kaaba’. Táan kk’a’ajsik wey yano’one’, yéetel láayli’ kba’atele’”, tu ya’alaj Mina Lucía González.
Tu ya’alaj xane’ yéetel féeminista múuch’kabile’ táan u láak’intiko’ob ko’olel loobilta’an, ti’al u beetiko’ob takpool tu táan júudisyal, beyxan ku líik’sik u t’aano’ob te’e kaajo’obo’, yéetel ku ts’áak u yojéelt jejeláas ba’al ti’ u jeel ko’olel ku xokik u reedes sosyalesil.
Xak'alutskíinsa'an tumen: Sasil Sánchez Chan
