Ikil u kaxta’al u yáanta’al ko’olel ma’ jáalk’ab u máansik u kuxtale’ tumen ti’ yaan ichil Centro de Reinserción Social (Cereso), mokt’anta’ab múul meyaj yéetel Instituto Municipal de la Mujer de Carmen (Inmucar), ti’al u ts’a’abal tu k’ab ko’olele’, uláak’ utsil ba’al ti’al u k’iinil kéen béeyak u suuto’ob kajtal ich kaaj.
Máax jo’olbesik Inmucar, Gladys Rivera López, tu ya’alaje, úuchik u k’a’ajsa’al U K’iinil Ko’olele’, beeta’ab jejeláas meyajo’ob tu kúuchil k’alab, ti’al u chíimpolta’al xan u kuxtal le yano’ob te’elo’.
“Ts’o’ok ktukultik ba’ax meyajil kun beetchajal tu kúuchil Cereso; le beetik mantats’ kxíimbaltik, ti’al kk’ajóoltik máaxo’ob yano’obi’, tumen chéen beey kéen kk’ajóolt ba’ax k’a’abéet ti’ob yéetel bix je’el u páajtal k-áantiko’ob ti’al u béeytal u ka’a yantalo’ob ich kaaj”.
También te puede interesar: Firman convenio Cereso e Inmucar para mujeres en el penal
Ichil ba’ax mokt’áanta’abe’ ti’ yaan ka “ts’a’abak u xookil infórmatikai’, le beetike’ yaan u ts’a’abal u nu’ukulil k’a’abéet, ti’al u béeytal. “Beyxan, ta’aytak kkáajsik u kaambalil paak’áal yéetel soolar. Yéetel u yáantajil Secretaria de Desarrollo Rural y Agropecuario, yaan kbiinsik ba’ax k’a’abéet ti’ob ti’al u beetchajal le kaambalo’oba’ ichil le k’alabilo’, tumen beyo’, yaan u páajtal u beetik u yo’ocho’ob tu juunal”.
Beyxan, tu ch’a’achibtaje’, u jala’achil u péetlu’umil Kaanpech, Layda Elena Sansores San Román, táan u kaxtik u ts’aatáantik máako’ob k’ala’an Personas Privadas de la Libertad (PPL), le beetik walkila’, yéetel ko’olel kun úuchul le meyajo’.
Tu tsikbaltaje’, ichil le kúuchilo’, táan xan u beeta’al meyajo’ob yéetel táan u ts’a’abal u jeel nu’ukulo’ob, je’el bix k’óoben, ti’al u yantal tu’ux u beetiko’ob u yo’ocho’ob, beyxan ka yanak máax beetik deportée yéetelo’ob yéetel yoga, tumen beyo’, ku kaxta’al u xu’ulsa’al kuxtal tu’ux ma’ tu péek máak, ichil uláak’ ba’alo’ob.
Xak'alutskíinsa'an tumen: Sasil Sánchez Chan
