Fondo Nacional de Fomento al Turismo (Fonatur) unaj u k’ubik ich t’aano’ob u méek’tant’a’ano’ob tumen u ch’i’ibalt’aanil maya, chontal de Oaxaca, yuto-nahua yéetel mixe-zoquee’, tuláakal avisos de privacidad yaan ba’al u yil yéetel Tren Maya, beey úuchik u ya’alik Instituto Nacional de Transparencia, Acceso a la Información y Protección de Datos Personales (INAI).
Ley de Transparenciae’ ku jets’ike’ najmal u ts’aatáanta’al ba’ax k’a’abéet ti’ máak ti’al u páajtal u sáasil ojéeltik ba’al, tu’ux ka béeyak u na’ata’al yéetel u su’utul ich máasewal t’aano’ob, beey tu ya’alaj u xmeyajil Norma Julieta del Río Venegas
“Máasewal máake’, je’el bix je’el máaxake’, yaan u páajtalil ti’ u yojéeltik ba’al ichil u t’aan, tumen beyo’, ku chíimpolta’an u t’aan ti’al u ts’a’abal u yojéelt ba’ax k’a’abéet”, tu ya’alaj Del Río Venegas tu súutukil úuchik u ts’áak k’ajóoltbil k’áatan tu táan Pleno.
Beyxan tu ya’alaje’, najmal u ye’esa’al legal bix ts’o’ok u ch’a’abal u jets’ t’aanil ba’ax ku beeta’al yéetel meyajo’ob tu’ux ku yantal u líik’sa’al wa ba’ax kúuchil, ba’ale’ unaj xan u jach chíimpolta’al u beeta’al wa noj meyajo’ob je’el bix Tren Maya, tumen beey jets’a’an ichil a’almajt’aan tu lu’umil México, yéetel uláak’ táanxel lu’umo’ob.
También te puede interesar: Fonatur debe entregar avisos de privacidad sobre el Tren Maya en lenguas indígenas: INAI
Ichil ba’ax yaan u yil yéetel Tren Maya, yanchaj juntúul máax tu k’áataj ti’ Fondo Nacional de Fomento al Turismo, ichil Plataforma Nacional de Transparencia (PNT), ka e’esak u jets’t’aanil u ch’a’abal, u je’ets’el u tojol k’áax yéetle je’el ba’axak ju’unil tu’ux ka sáasilkúnsa’ak bix úuchik u bo’ota’al ba’ax ts’o’ok u ch’a’abal yéetel bajux jun bo’otbil tuláakal k’áax kun ch’a’abil ti’al u beeta’al chismes k’áak’.
Ba’ale’, ichil ba’ax tu núukaj Fonature’ ma’ bin táan u tsa’ayal u núukik ba’ax k’áata’abe’, le beetike’ tu ya’alaje’ ma’alob wa ka yúuxta’ak k’áata’an ti’ Secretaría de Desarrollo Agrario, Territorial y Urbano. Beey túuno’, máax k’áate’ ma’ ki’imak u yóol yéetel ba’ax núuka’abe’ ka tu k’áataj ti’ INAIe’ ka yanak u yokol u xak’alt ba’ax úuchij.
Fonatur túune’ tu ya’alaje’ mina’an ti’ le ju’uno’ob ku k’áata’al yóok’lal u je’ets’el u tojol k’áax, mix xan uláak’ ju’uno’ob sáasilkúunsik bix úuchik u beeta’al le maan k’áaxo’.
Del Río Venegas tu ya’alaj ka tu núukaj Fonature’, tu túuxtaj xan u liinkil Internet ti’al u xo’okol avisos de privacidad ba’ale’ ich káastelan, mina’an ich máasewal t’aano’ob, je’el bix tu k’áataj le máako’. Ba’ale’ a’alamajt’aane’ ku jets’ik ichil artículos 11, tu jaatsil XIII yéetel 61, u k’a’abéetchajal u ts’íibta’al xan ich máasewal t’aan, braille wa u jeelo’ob”.
Le beetik túune’ u Plenoil INAI tu jets’aj u yantal u k’exik ba’ax tu núukaj Fonatur, ti’al u yantal u k’ubik avisos de privacidad ichil le t’aano’ob k’áat’aabo’; ti’al túun u béeytale’ mola’aye’ yaan u yantal u yilik bix ken u beetej ti’al u chíimpoltik a’almajt’aan.
Xak'alutskíinsa'an tumen: Sasil Sánchez Chan
