U cha’anil Feria Internacional del Libro de Yucatán (Filey) ti’ u ja’abil 2022e’, yaan u beeta’al u ya’abil ti’ Internet. Beey úuchik u k’a’ayta’al tumen máax jo’olbesik, Enrique Martín Briceño tu súutukil úuchik u k’a’ayta’al ba’ax kun beetbil ichil le 26 ti’ marzoa’ tak 3 ti’ abril, ikil táan xan u k’iimbesa’al 100 ja’abo’ob yanak Universidad Autónoma de Yucatán (UADY).
Martín Briceño tu ya’alaj te’e ja’aba’ yaan u ye’esa’al tuukul ts’o’ok u chan máan k’iin yanak, yéetel yanchaj meyaj ti’al u jaajkúunsa’al ichil u kuxtal kaaj. Felipe Carrillo Puerto, juntúul ti’ le je’elo’obo’, ts’o’okole’ juntúul ti’ le máaxo’ob káajs le najil xooko’.
U t’aanil Filey te’e ja’aba’ leti’ le je’ela’: “Tuláakal yóok’ol kaabo’ob ka béeyak”, ts’o’okole’ u 75 por siientoil meyajo’ob kun beetbile’ ti’ Internet kun máansbil. Yaan jayp’éel ti’ le je’elo’obo’, ti’al u cha’anta’ale’ unaj u yáax ts’íibitik u k’aaba’ máak ti’al u páajtal u cha’anta’al.
Ichil meyajo’ob ku beetbile’, ti’ yaan le jts’a’ab u k’aaba’ beey Los Mundos de la Palabra, tu’ux yaan u táakpajal kex 35 u túul ajts’íibo’ob taalja’an ti’ ukp’éel noj lu’umo’ob, ichilo’obe’ ti’ yaan Remedios Zafra; Roberto López; Horacio Cerutti; Nadia Fink; Eric Nepomuceno, Natalia Toledo; Mario Bellatín yéetel Marva Flores.
Beyxan, ichil mexikoil aj ts’íibo’ob kun táakpajale’ ti’ yaan Juan Villoro; Alberto Ruy Sánchez; Alba García; Verónica Murguía; Hernán Lara; yéetel Mónica Nepote, máaxo’ob yaan u ts’áako’ob k’ajóoltbil túumben meyaj u beetmo’ob.
También te puede interesar: Presentan actividades de la Filey 2022; será 75 por ciento en modalidad virtual
Ichil uláak’ máax yaan u táakpajale’ ti’ yaan José Díaz Cervera; Feliciano Sánchez Chan; Briceida Cuevas; Javier España; Karla Marrufo; yéetel Elisa Chavarrea, beyxan yaan u táakpajal u múuch’kabil Atorrantes yéetel De Península a Península, máax yaan u ts’áako’ob k’ajóoltbil xook ich maaya yéetel káastelan.
Yóok’lal túun le je’ela’, Enrique Martíne’ tu tsikbaltaj Filey te’e ja’aba’ yaan u beetik jejeláas meyajo’ob yaan u yil yéetel maaya miatsil. Je’el bix noj chíimpolal kun beetbil yóok’lal Domingo Dzul Poot, jts’íib yéetel paleógrafo. Beyxan yaan u ye’esa’al u nalts’amil U Chiich Ch'iich (Abuela Pájaro) ts’íibta’an tumen Janil Uc, ichil uláak’o’ob.
Ti’al u xak’altik máak tuláakal ba’ax kun beetbil ti’ FIleye’, ku páajtal u xak’alta’al www.filey.org, beyxan meyajo’obe’ yaan u máansa’al ti’ u Facebookil: @lafiley; yéetel @face.uady, beyxan YouTube FILEYTV.
Xak'alutskíinsa'an tumen: Sasil Sánchez Chan
