Walkila’ yaan ukp’éel bejo’ob ku yáalkab Pacífico tak Atlántico, yéetel ku k’áatalo’ob tu k’áaxil Petén, beyxan ti’ úuchben noj kaajo’ob, je’el bix Antigua, Guatemala, le beetike’ ku páajtal u cha’antal kéen xíimbalta’ake’, u ki’ichkelemil u puksi’ik’al Maaya Lu’um, úuchak u ka’a káajal u k’a’amal máak p’el jéets’ek u pak’be’en k’oja’anil Covid-19.
Lourdes Maldonado, máax jo’olbesik mercadeo ichil u mola’ayil Instituto Guatemalteco de Turismo (Inguat), tu tsikbaltaj, tu súutukil úuchik u k’a’aytal tu táan mola’ayob k’a’aytik péektsilo’obe’, ba’ax le ku páajtal u seen xíimbalta’al te’e noj lu’umo’, ts’o’okole’ tu ch’a’achibtaj México xan: “tséel yanik, láak’o’ob, ya’abach ba’al nupiko’on, je’el bix miatsil, janalil yéetel uláak’ ba’alo’ob”.
También te puede interesar: Guatemala, el corazón del Mundo Maya, late fuerte en materia turística
Guatemalae’ jump’éel ti’ le ukp’éel noj lu’mo’ob méek’tanta’an tumen istmo centroamericano. Maaya miatsile’ mina’an u xuul, mu’uk’a’an yanik ich guatemaltekail lu’um, tu’ux jeets’el yaan 21 u p’éel maaya t’aano’obi’. Chíimpolta’an beey corazón del Mundo Maya; te’elo’ táaka’an jo’op’éel u péetlu’umilo’ob México, (Tabasco, Campeche, Chiapas, Yucatán y Quintana Roo) yéetel jo’op’éel noj lu’umo’ob: México, Belice, El Salvador, Guatemala yéetel Honduras.
Quahtemallan, u jaajil u k’aaba’, u k’áat u ya’al “u lu’umil ya’abach che’ob”. Ti’ ka’ajan 16 miyonesil máako’ob, yéetel u noj kaajile’, Ciudad de Guatemala, leti’e’ asab mu’uk’anchajan ichil Centroamérica, yéetel yaan tak u asab k’a’anan kúuchil neegosyos ti’ le baantao’.
Lourdes Maldonadoe’, tu ya’alaj xan Inguate’ táan u meyajtik u jejeláasil bej ti’al u k’uchul máak xíinximbal, ti’al u yila’al miatsil, ts’aakankil, kaambal, múuch’tambalo’ob, cha’an ch’íich’, ichil uláak’ ba’alo’ob. Tu ya’alaj xane’ u túumben bejil TAG Airlines yaan u je’ebel le 29 ti’ abril ku taala’, yéetel tu noj kaajil Jo’, Yucatán kéen jóok’ok máak, le beetike’ ku páajtal xan u xíimbalta’al u yúuchben kaajilo’ob Maaya Lu’um, je’el bix Chichén Itzá wa Tikal.
Xak'alutskíinsa'an tumen: Sasil Sánchez Chan
