Yóok’lal múul meyaj táan u yantal ichil u nu’ukbesajil Activismo Lenguas Mayenses, yéetel Rising Voices beyxan Fundación Kellogg, k’a’aytab páayt’aan ti’al maaya wíinik kaja’an tu petenil Yucatán yéetel Chiapas, ti’al u ts’a’abal k’ajóoltbil tuukul meyajo’ob ku béeytal u beeta’al ti’ kaajo’ob, ti’al u táakmuk’ta’al u jejeláasil maaya t’aan ti’ Internet.
Tu ts’ook u láaj xak’alta’al tuukul meyajo’obo’, u nu’ukebsajil Becas para el Activismo Digital de las Lenguas Mayenses 2022e’, yaan u yéeya’al lajuntúul máak ti’al u ts’a’abal le áantajo’; u nooyil meyaje’ leti’ u beetik uts ti’ maaya kaajo’ob yéetel u mu’uk’ankúunsa’al maaya t’aano’ob.
“Táan kkaxtik máaxo’ob u k’áat u chíikbeso’ob yéetel u mu’uk’ankúunso’ob le t’aano’oba’, beyxan máaxo’ob u k’áat u k’i’itbeso’ob ba’ax u yojelo’ob yéetel ba’ax ts’o’ok u kaniko’ob yóo’lal díijital nu’ukulo’ob yéetel u jeel máako’ob te’e kaajo’obo’. Ku kaxta’al ka k’a’abéetkunsa’ak nu’ukbesajo’ob ma’ táan u yantal u bo’ota’al ti’al u meyaj yéetel ma’ u talamtal ti’ kaaj u k’a’abéetkunsa’al”, ku xo’okol tu chuuka’anil le ketlamo’. Ku páajtal u xak’alta’al tu kúuchil Internet bit.ly/convADLM
Máax u k’áat táakpajale’, unaj ts’o’ok 18 u ja’abil. Unaj síij tu péetlu’umil Chiapas, wa tu petenil Yucatán; maaya wíinik yéetel u yojel u t’an le maayao’. U ts’ook k’iinil u túuxta’al tuukul meyajo’obe’ leti’e’ 10 ti’ abril ku taala’.
También te puede interesar: Ofrecen becas para el activismo digital de la lengua maya
Ti’ le lajun máaxo’ob kun yéeybile’ yaan u láak’inta’al tu jo’oloj waxakp’éel winalo’ob, ti’al u beelkunsa’al ichil u meyajil áaktibismo ku tukultik u beetiko’. Beyxan, yaan u k’u’ubul to’ob 2 mil 500 doolares, óoli’ 50 mil pesos ti’al u béeytal u beetik.
Tu jeele’, máax kun áantbile’ yaan u yantal u táakpajal ti’ múuch’tambalo’ob yaan u beeta’al juntúul lalaj winale’, u táakpajal ichil u múuch’ máako’ob láayli’ meyajtik díijital ba’alo’ob, u k’i’itbesik tu kaajalo’ob ba’ax kéen u beeto’ob yéetel u cha’ak u láak’inta’alo’ob ka’alikil tu beetiko’ob le meyajo’. Máaxo’ob ts’a’aban ti’al láak’inaje’ máako’ob kaambanaja’ano’ob ti’ meyajo’ob je’el bix le je’elo’ yéetel ti’ meyajo’ob ku beeta’al ti’ kaajo’ob.
Yaan u asab chíimpolta’al tuukul meyajo’ob tu’ux kun táakbesbil paalal, yéetel tu’ux ka chíikpajak táan u mu’uk’ankúunsa’al yéetel u ka’ansal ti’ u jeel máako’ob le maaya t’aano’obo’.
Xak'alutskíinsa'an tumen: Sasil Sánchez Chan
