U jejeláas u taakóosil páastor, sirloin, chooch, aak’, buut’, píibil k’éek’en, ichil uláak’o’obe’, yaan u páajtal u ki’iki’ jaanta’al tu k’iinilo’ob 1, 2 yéetel 3 ti’ abril, tu cha’anil Tacocardia-Festival del taco y la Chela Artesanal, táan u taal u beeta’al tumen Yucatán Foodie and Travel.
Ichil kúuchilo’ob konik taakose’ yaan u táakpajkal Trompos, Tacostumbras, Tía Chivis, Smokehouse, Sirloin Norteño yéetel u jeel ku beeta’al tu’ux ma’ táan u k’a’abéekunsa’al bak’.
TS’o’okole’, te’e súutuk xano’ yaan u xan u ko’onol uláak’ ki’iki’ waajo’ob, ch’ujuko’ob yéetel u ja’il káaltal beeta’an tu péetlu’umil Yucatán, je’el bix le meyajta’an yéetel kaab, beyxan jáabanero. Uláak’ ba’ale’, bazar “Mérida blanca” yaan xan u táakpajali’. Leti’e’ yaan u konik u jejeláas ba’alob beeta’an tumen meyaj máako’ob ti’ le péetlu’umilo’.
Cha’ane’ yaan u beeta’al tu kúuchil Centro de Convenciones Siglo XXI, te’e k’iino’oba’: viernes 1 ti’ abril, láas 4 tak láas 10 áak’ab; sábado yéetel domingoe’ láa 1 tak láas 10 áak’ab.
También te puede interesar: ¡A pedir con todo!, en 'Tacocardia, Festival del Taco y la Chela Artesanal'
Beey túuno’, máax jo’olbesik Yucatán Foodie and Travel, Alberto Lavalle, tu ts’áaj k’ajóoltbile’ yaan u k’i’itbesa’al ixilo’ob, tumen le janabe’enba’ala’ unaj u jach tóoch’ta’al.
ÚUchik u yantal múul meyaj ichil Secretaría de Desarrollo Rural de Yucatán (Seder) yéetel Secretaría de Fomento Turístico de Yucatán (Sefotur) beyxan Ayuntamiento de Ixil, je’ets’e ixilo’obe’ yaan u ko’onol ka’alikil táan Tacocardia-Festival. Le k’uta’ano’, yóok’ol taakos, yóok’ol sáalbuut’, ichil uláak’o’ob.
Lavalle tu ya’alaj yéetel cha’ane’ táan u páa’ta’al ka yanak u ya’abil náajal, tak ti’ le yanchaj ka’aj beeta’ak tu ts’ookbalako’. Yaan xan u ts’a’abal u nu’ukulil u kaláanta’al máak ti’ pak’be’en k’oja’an.
Xak'alutskíinsa'an tumen: Sasil Sánchez Chan
