Ichil ba’ax ila’an táan u yúuchul te’e ts’ook k’iino’oba’ ti’ ba’ax yaan u yil yéetel xíinximbalil ku beeta’al tu baantail Caribee’, táan u tukulta’ale’, je’el u ka’a ch’a’ak u yóol lemeyajila’, tumen táan u yila’ale’ je’el u k’uchul maanal jump’éel miyoon 170 mil u túul ajxíinximbalo’ob tak te’e péetlu’uma’, lela’ ku ye’esik 36.6 por siientoil maanal ti’ le yanchaj tu ja’abil 2021. Beyxan, náajal je’el u yantal tu yóok’lale’ je’el u chukik 972 miyoonesil doolarées, 67 por siientoil maanal ti’ le yanchaj tu ja’abil 2021 láayli’ te’e jatsk’iino’obo’.
Ichil ba’ax ts’a’aban ojéeltbil tumen Secretaría de Turismo, jo’olbesa’an tumen Bernardo Cueto Riestra, a’alabe’ u jach jats’utsil ba’ax yaan tu Caribeil Quintana Rooe’ ti’ yaan ichil le jo’op’éel tu’ux ku asab xíimbalta’al.
Le beetik, u péetlu’umil Quintana Rooe’ táan u líik’sikubáaj, ti’al u k’amik aj xíinximbalo’ob tu asab k’a’anan jatsk’iinilo’ob je’elil: Semana Santa 2022, tumen te’ela’ yaan u béeytal u ch’a’ajolta’al meyajo’ob beetik u yokol taak’in te’e péetlu’umo’, yéetel tumen le je’elo’, ku beetik uts ti’al tuláakal máak.
Jala’ach Carlos Joaquíne’ ts’o’ok u jets’ik jayp’éel k’a’anan ba’alo’ob ti’al u yutsil máan le k’iino’oba’, tumen najmal u kaláanta’al u toj óolal tuláakal máax kun k’uchul ba’ale’ beyxan máaxo’ob kun k’amik.
También te puede interesar: QRoo espera más de un millón 170 mil turistas en Semana Santa
Le beetike’, patjo’oltab u nu’ukbesajil “Sé parte de la solución”, ts’o’ok u káajal u beeta’al tu kúuchil u jáayal péepen k’áak’, beyxan tu’ux ya’ab u k’uchul máaki’, ti’al u yojéelta’al ba’ax unaj u beetiko’ob yéetel jets’a’an ti’ a’almajt’aan k’a’anan u chíimpolta’al ka’alikil ti’ ku máano’ob Quintana Roo.
Beey túuno’, jséekretaryo Bernardo Cueto tu ya’alaje’, láayli’ táan u yúuchul meyaj ti’al u k’a’aytal uláak’ kaajo’ob yéetel kúuchilo’ob ku páajtal u xíimbalta’al, le beetik te’e ja’aba’, yaan u asab k’a’ayta’al Riviera Maya, tumen tu kaxta’al u ya’abkunsa’al yóok’ol u 69.2 por siientoil, lela’ óoli’ 543 mil 956 ajxíinximbalo’ob. U ka’ap’éel kaaje’, Cancún tu’ux ku kaxta’al ka náakak maanal 349 mil ajxíinximbalo’ob.
Beyxan, ichil uláak’ kaajo’ob yaan te’e noojol táan xan u ya’abtal máax ku k’uchule’, ti’ yaan Bacalar.
Le beetik xane’ jach ta’aytak u káajal u jaatsk’iinilo’ob meyaj Semana Santa (9 tak 24 ti’ abril), yéetele’ táan u kaxta’al ka kaláanta’ak u toj óolal kaaj tu k’iinilo’ob je’elil. Ti’al u béeyta’ale’, ts’o’ok u meyajta’al nu’ukbesajo’ob ti’al u k’a’amal máak tu péetlu’umil Quintana Roo.
Xak'alutskíinsa'an tumen: Sasil Sánchez Chan
