Ikil u kaxta’al ka yanak múul meyaj ti’al u péektsilta’al u xíimbalta’al u kaajil Saki’, u mola’ayil ADO yéetel u múuch’kabil Asociación de Restaurantes de Valladolid ARVAY A.C., táan u kaxtiko’ob ka yanak ba’al ti’al u k’uchul máak tak te’e kaaj chíimpolta’an xan beey Pueblo Mágico.
Ka’aj ts’o’ok u much’ikubáaj máaxo’ob jo’olbesik u mola’ayil ADo tu lu’umil México yéetel máaxo’ob chíikbesik ARVAY A.Ce’., j ch’a’ab u t’aanil u beeta’al múul meyaj ti’al u tóoch’ta’al ka’aj xíimbalta’ak u kaajil Saki’, La Perla del Oriente, tumen yaan jejeláas ba’alobi’, je’el bix u kúuchilo’ob janal, ts’ono’oto’ob yéetel u kúuchil u ma’anal ya’abach ba’alob.
Ichil túun ba’ax ku tukulta’al u beeta’ale’, ti’ yaan ka je’ets’ek kúuchilo’ob ti’al u ts’a’abal ojéeltbil jejeláas kúuchilo’ob yéetel náaysaj óolo’ob ku páajtal u beeta’al tu kaajil Saki’. Le je’elo’oba’ ti’ kun ts’a’abilo’ob tu téerminalil Cancún yéetel Perla del Oriente. Beyxan ichil xíimbalkunsaj ku beeta’al tumen u Turibusil ADO te’e méek’tankaajo’, yaan u ts’a’abal ti’ ajxíinximbalo’ob jump’éel ju’un tu’ux ts’a’aban jejeláas kúuchilo’ob ku páajtal u xíimbalta’al yéetel u bin máak ti’al janal te’e baantao’.
También te puede interesar: ADO y ARVAY unen esfuerzos para promover el turismo en Valladolid
Beyxan, máaxo’ob kun na’akal te’e Turibuso’, yaan xan u ts’a’abal ti’ob deskuentos yéetel uláak’ utsil páajtalilo’ob ti’ kúuchilo’ob nuupulo’ob meyaj yéetel Asociación de Restaurantes de Valladolid ARVAY A.C.
Beey túuno’, yóok’lal múul meyaj táan u beeta’al yéetel ADOe’, t’aanaj máax jo’olbesik ARVAY A.C., Jordy Abraham Martínez, ka’aj tu ya’alaje’ “jump’éel noj páajtalil ti’al u yantal múul meyaj beey táan u kaxta’al u ch’a’ajolta’al ba’al tu jo’oloj yanak pak’be’en k’oja’an. K-ojel u yantal bix u péek máak ti’al u k’uchul Saki’e’, jach k’a’anan ti’al u meyajil u k’a’amal ajxíinximbalo’ob.
T’aanaj xan máax chíikbesik u mola’ayilo’ob janal, Abraham Martínez, máax tu ya’alaje’ “táan kkaxtik ka yanak múul meyaj yéetel ADO ti’al u tóoch’ta’al u k’a’anan kúuchilo’ob Saki’, tumen kéen kóojok máake’ ku yantal meyaj to’on yéetel le je’elo’, ku beetik xan u xíimbal le méek’tankaaja’”.
Xak'alutskíinsa'an tumen: Sasil Sánchez Chan
