Te’e ja’aba’ ku chukik uktéen u chíikbesa’al Jesús tumen Andrés Medina Chalé, tumen jach te’e k’iino’ob kun beetbil bíiakrusis Acanceh, leti’e’ asab k’a’anan ku beeta’al ichil nojol-lak’inil México. Tu jo’oloj ka’ap’éel ja’ab ma’ béeyak u táakpajal kaan ka’alikil táane’, te’e ja’ab 2022 yaniko’ona’, yaan u ch’a’ajolta’al e’esajil, suuk u beeta’al tumen u múuch’il Renacimiento, tu táan Pirámide de los Mascarones.
U jejeláasil ba’al ku beeta’al Semana Mayore’, káajo’ob le 10 ti’ abril máanik te’e kaajo’; yáaxike’ beeta’ab Domingo de Ramos, chíikbesa’ab bix ook Jesús tu kaajil Jerusalén. Ma’ táan u cha’abal ka’ach u bin máak ti’al u cha’atej, ba’ale’ yanchaj máaxo’ob binij.
Bejla’a Jueves Santoe’ yaan u beeta’al u yee’sajil Última Cena; tu’ux yaan u chíikbesa’al bix beeta’ab le p’o’ ooko’; bix k’uba’ab Jesús tumen Judas, ichil uláak’o’ob. Tuláakale’ ti’ kun e’esbil aktáan u najil k’uj Nuestra Señora de la Natividad.
También te puede interesar: Andrés Medina representará a Cristo por séptima ocasión en viacrucis Acanceh
Ti’al Viernes Santo, ku ya’alik Andrés Medina, leti’ kéen beeta’ak u ye’esajil ba’ax ku ya’alik kili’ich ts’íib. CHúumuk k’iin kéen káajak yéetel u juusyoil Pilatos yéetel Herodes; kéen ts’o’okoke’ yaan u ye’esa’al kéen seen ja’ats’ak yéetel kéen ts’a’abak u k’i’ixel u pool.
“Táankab kéen beeta’ak le e’esajilo’ob je’elo’, ti’al u kaláanta’al máaxo’ob kun táakpajal, tumen beey je’ets’ unaj u beeta’al tumen Secretaría de Salud de Yucatán (SSY)”, tu tsikbaltaj.
Kéen ts’o’okok u beeta’al juisyo’obe’, leti’ kéen káajak le xíimbalilo’, ti’ kun ts’o’okol naats’ ti’ u k’íiwikil Acanceh. Kéen ts’o’okoke’ yaan u ka’a bin máak tu táan Pirámide de los Mascarones, tu’ux yaan u ba’ajal Cristo te’e cruuso’, kéen u chuk láas 3 tu taal u chíinil k’iin.
Yéetel le ja’aba’, ku náakal ukp’éel ja’ab chíikbesa’ak Cristo tumen Andrés Medina ti’al kéen beeta’ak u bíiakrusis Acanceh; kantéen ti’ le je’elo’ táakpaja’an kaaj, yéetel uláak’ ka’ap’éele’ chéen ichilo’ob beetchaji. U ti’al Andrese’ jach noj ba’al u beetik, ma’ táan u páajtal mix u tsikbaltik ba’ax ku yu’ubik kéen u beetej.
Xak'alutskíinsa'an tumen: Sasil Sánchez Chan
