Walkila’, táan u chukik 65 sa’atak u kuxtal jk’aay yéetel jbeet balts’am Pedro Infante, le beetike’ máaxo’ob p’aatal tu tiiendail “La Socorrito”, tu’ux lúub péepen k’áak’ tu’ux na’akan ka’ach leti’, ku péeko’ob ja’ab man ja’ab ti’al ma’ u tu’ubsa’al ba’ax úuch le 15 ti’ abrilo’, yéetel ti’al u k’a’ajsa’al u kuxtal Infante.
Luis Ariel Canto García, máax jo’olbesik u múuch’kabil máako’ob k’a’ajsik Pedro Infantee’, ku tsikbaltike’, u chiich, u nool yéetel u yuumo’obe’ ti’ kaja’ano’ob te’e naj tu’ux lúub péepen k’áak’ tu ja’abil 1957. Ti’ p’aatal tu bejil 54 yéetel 87, ti’ u k’íiwikil u noj kaajil Jo’.
Tiienda “La Socorrito”, láayli’ ts’aka’an. U yóox pakab ch’i’ibal baatsil ku meyaj walkila’, ts’o’okole’ láayli’ u k’a’ajsa’al ba’ax úuch te’e k’inako’. Beey úuchik u k’ajóolta’al Pedro Infante tumen Luis Ariel, tumen jach paal ka’aj káaj u yilik u k’a’ajsa’al tu yotoch, ts’o’okole’ ku k’uchul tak uláak’ máako’ob xíinximbal te’e najo’, tumen ts’o’okili’ u káajal u beeta’al meyajo’ob ti’al u k’a’ajsa’al Infante.
También te puede interesar: La memoria de Pedro Infante está plasmada para siempre en Mérida
Ka’aj k’uch xíimbal Luis Manuel Pelayo tak te’elo’, ti’al 1991e’, leti’ ka’aj ch’a’ajolta’ab u beeta’al jejeláas meyajo’ob ti’al u k’a’ajsa’al jk’aay.
Loobilaj úuch ti’ péepen k’áak’ tu’ux kíim Pedro Infantee’, tu beetaj u káajal u bin máak u xíimbalt le najo’; jejeláas tu’ux ku taalo’ob. Ti’al u káajbale’, ku k’a’amal máak tumen in nool yéetel u chiich, le beetik leti’e’ “jach suukchaj u yu’ubik u ya’alal Pedro Infante je’el ba’axak súutuk”.
K’aja’an ti’e’, ka’ach tu paalile’, u chiiche’ ku k’áatchibta’al tumen u máakilo’ob radio, ti’al u tsikbaltik bix úuchik ba’al te’e najo’, ka’aj lúub péepen k’áak’i’.
Beey túuno’, tu ja’abil 2017, tu k’iinil táan u beetik u jo’olpóopil kaaj Mauricio Vila Dosale’, u múuch’kabil máako’obe’ “tu béeykusaj u beetiko’ob u yantal jump’éel kúuchil ti’al u chíikbesa’al tu’ux lúub péepen k’áak’”, tumen béeychaj u ts’a’abal jump’éel paarkée ti’al le je’elo’, kex 10 meetrosil náachil ti’ tu’ux jach úuch ba’al.
Te’e ja’aba’, táan u k’a’ajsa’al tuka’atéen úuchik u kíimil; le beetike’ yaan múul meyaj xan yéetel Ayuntamiento de Mérida, ikil táan u beeta’al u yáalkabil 5 kms ti’al u k’a’ajsa’al jbeet balts’am, ts’o’okole’ te’e tiienda “La Socorritoo’” yaan u k’a’amal u múuch’kabil CicloTurixes, láax 8 áak’ab; beyxan yaan u ts’a’abal cha’atbil jejeláas pelikuuláas, je’el bix xan k’aayo’ob tu beetaj Infante.
Xak'alutskíinsa'an tumen: Sasil Sánchez Chan
