Ya’ab kaambal táan u binetik ti’ u ajkanan kaajilo’ob Quintana Roo, beey úuchik u ya’alik máax jo’olbesik Seguridad Pública estatal, Lucio Hernández Gutiérrez, máax tu ya’alaje’, ts’o’ok u ts’a’abal yáax kaambal ti’ u 87.7 por siientoil ajkanan kaajo’ob.
Leti’ xane’ tu tsikbaltaj láayli’ u chi’chnaktal yéetel u péek u yóol, je’el bix u yúuchul ti’ ya’abach u kajnáalilo’ob Quintana Roo, ikil u seen úuchul loobilajil, u ya’abile’ tu noj kaajil Cancún, le beetike’, yóok’lal le ba’ax ku yila’alo’, táan u kaxta’al u k’éexel ba’al; yaan u beeta’al jejeláas nu’ukbesajo’ob, tu’ux táan u táakbesa’al u mu’uk’ankúunsa’al kaambal ku k’amik ajkanan kaajo’ob.
“Ya’ab meyaj táan u binetik, leti’ u jaajilo’. Beyxan, kin na’atik xane’, tumen ma’ táan u jach oksaj óolta’al u meyaj jo’opóopo’obe’, kajnáalo’obe’ ma’ táan u beetiko’ob tak poolo’ob tumen saajko’ob u beeta’al k’aas ti’ob, tumen ku chi’ichnaktalo’ob kéen t’anako’ob ti’al u yoksa’al saajkil ti’ob yéetel kéen a’alak ba’ax jaaj u ti’alo’ob… jujump’íitil u yoksikubáaj tu pool máak, tak kéen k’u’ubuk taak’in ti’ob, ts’o’okole’ máake’ ma’ táan u tak pool. Le je’el túuno’, ku p’atik k’aaxalil u k’ab le mola’ayo’obo’”, tu ya’alaj. Le beetike’, tu páayt’antaj kaaj ti’al u takpool kéen úuchuk wa ba’ax.
También te puede interesar: Falta mucho trabajo por hacer, reconoce Seguridad Pública de QRoo
Walkila’, ts’o’ok u yáax kaambal u meyajnáalilo’ob mola’ay, ts’o’okole’ láaj p’isa’an u meyajo’ob tumen u kúuchil Centro de Evaluación y Confianza.
Te’el k’iino’oba’, jts’a’ab k’ajóoltbil u k’a’alal jayp’éel u kúuchilo’ob janal. U ts’ooke’, leti’e’ k’ajóolta’an beey El Chef, ts’o’okole’ yaan uláak’ kúuchilo’ob tu kaajil Benito Juárez tu’ux ucha’an loob te’e ts’ook k’iino’oba’, ba’ale’ tu ya’alaje’, mix Fiscalía General del Estado, mix leti’ob tu kúuchil C5, u yojelo’ob wa táan u yoksa’al saajkil te’el kúuchilo’oba’.
“Chéen jump’éelili’ (takpool) yaan, leti’e’ k’iin ka’aj úuch le loobilajo’, le beetik yanchaj u beeta’al ba’al beyo’ (u k’a’alal). Úuch t’aan tu nuumeroil 911 ti’al u takpolta’al u yokolta’al jump’éel naj, ba’ale’ le ookol beetchajo’, ti’ j-úuch tu’ux yaan le kúuchil janalo’, tu’ux ook le k’aak’as wíiniko’obo’ ti’al u ch’a’ak ba’al ma’ u ti’alo’obi’, ichilo’obe’, taak’in yaan ka’ach te’el kúuchilo’”, tu ya’alaj Hernández Gutiérrez.
Leti’ ba’ax beet u k’a’alal le kúuchilo’, u yantal saajkil yóok’lal ba’ax ku yúuchul bejla’o’, ts’o’okole’ tu tsikbaltaj xan leti’e’ tsikbalnaj yéetel u yuumil le mola’ayo’, ti’al u jets’ik ti’e’ yaan u jach kaláanta’al yéetel yaan u ts’aatáanta’al, ti’al ma’ u yantal u k’a’alal le kúuchil ka’acho’, ba’ale’ ma’ bin béeychaj u t’aan yéeteli’.
“Ya’ab meyaj táan u binetik, ti’al u páajtal u éejenta’al xan u meyaj u mola’ayilo’ob kananil, ti’al u yu’ubik máak kaláanta’an tu beel”, ts’o’okole’ tu ya’alaje’, ti’ maanal óoxp’éel ja’ab káajak u meyajo’obe’, ts’o’ok u ma’achal maanal 3 mil u túul k’aasil máak ku beetik ba’al tu péetlu’umil Quintana Roo.
Xak'alutskíinsa'an tumen: Sasil Sánchez Chan
