Coordinación Estatal de Protección Civil (Procivy) ts’o’ok u káajal u chich meyaj ti’al u líik’sikubáaj te’e ja’aba’, ikil táan u chúunsa’al u nu’ukbesajil Programa Especial de Ciclones Tropicales de Yucatán.
Ichil meyajo’ob túun táan u beeta’ale’, ti’ yaan Reunión de Preparación de la Zona Costera para la Temporada de Huracanes, beetchaj le miércoles máanika’, tu kúuchil IX Zona Naval ti’ u mola’ayil Secretaría de Marina (Semar); tu’ux táakpaj u meyajnáalilo’ob le mola’ayo’, Capitanía de Puertos, u jo’olpóopilo’ob kaaj yéetel u meyajnáalilo’ob Protección Civil ti’ u 13 u p’éel méek’tankaajo’ob yano’ob te’e jáal ja’o’, tu’ux ts’a’ab k’ajóoltbil jejeláas ba’alo’ob ichilo’ob yéetel ba’ax nu’ukbesajo’ob kun beetbil ti’al u kaláanta’al kaaj.
Beyxan jets’a’abe’, yaan yantal múul meyaj ti’al u kaláanta’al kaaj kaja’an te’e jáal ja’o’, yéetel yaan u mu’uk’ankúunsa’al nu’ukbesajo’ob tu’ux ku yantal u jóok’sa’al kaaj tu yotoch, ti’al u biinsa’alob kaláantbil ti’ uláak’ kúuchilo’ob; le je’elo’ ku beeta’al tumen u jala’achil u péetlu’umil Yucatán, le beetike’ táan u múul xak’alta’al tuláakal ba’ax k’a’abéet ichil Secretarías de Salud (SSY) yéetel u mola’ayil Educación (Segey).
También te puede interesar: Yucatán alista plan de atención ante temporada de ciclones tropicales
Uláak’ ba’ale’, ma’ táan u xo’ot’ol múuch’tambalo’ob te’e méek’tankaajo’obo’: ti’al sáamal viernes 20e’ yaan u beeta’al Tizimín; te’e noojolo’, yaan u beeta’al Tekax tu k’iinil jueves 26. Le je’elo’, ti’al u tsikbalta’al tu beel ba’ax kun jets’bil, ts’o’okole’ mantats’ u xak’alta’al ba’ax ku chíikpajal ichil Atlas de Peligros por Fenómenos Naturales.
Beey túuno’, Servicio Estatal de Monitoreo y Alertamiento (SEMA) ku meyaj ku yáam Procivye’ tu jets’aj tu’ux ku béeytal u paklan t’anikubáaj yéetel le 106 u p’éel áayuntamiento’obo’, yéetel tu k’áataj ma’ u ch’éenel u beeta’al múuch’tambalo’ob yéetel Consejos Municipales de Protección Civil, ti’al ma’ u náayal u yóolo’ob ti’ mix ba’al ka k’uchuk úuchuk.
Ts’a’ab k’ajóoltbil xane’, yaan u beeta’al Primer Congreso Estatal de Preparación ante el Riesgo de Huracanes, yéetel le ku kaxta’al u ka’ansa’al mola’ayob yéetel kúuchilo’ob ti’al u yojéeltiko’ob ba’ax unaj u beetiko’ob kéen taalak chak ik’al. Le je’elo’ yaan u beeta’al martes 24, Sala Mayamax ti’ u kúuchil Gran Museo del Mundo Maya; máax u k’áat táakpajale’ ku páajtal u ts’íibtik u k’aaba’ tu kúuchil Internet: https://bit.ly/3McMchB.
Ti’ u mola’ayil Procivye’ yaan wakp’éel u tu’uk’ilo’ob meyaj, u ts’ook ts’a’abe’ ti’ yaan tu méek’tankaajil Motul; yéetel le je’elo’obo’ táan u tukulta’al u séebkunsa’al meyaj kun k’a’abéetchajal, ti’al u yantal tu’ux u kaambal ajmeyajo’ob yaan ba’al u yil ti’al u kaláanta’al kaaj ti’ chak ik’alo’ob.
Xak'alutskíinsa'an tumen: Sasil Sánchez Chan
