Foto: Cecilia Abreu

Tu chúumuk k'iinil le 24 ti' mayo máanika', U Jala'achil u Lu'umil Yucatáne' tu beetaj mokt'aan yéetel Unión Europea, tu'ux táakpaj Secretaría de las Mujeres (Semujeres), Secretaría de Seguridad Pública (SSP), Comisión Estatal de Atención a Víctimas (CEAV), Fiscalía General del Estado yéetel Instituto Estatal de Acceso a la Información Pública de Yucatán (Inai), ti'al u mu'uk'ankúunsa'al meyaj ku beeta'al ti'al u kaláanta'al ma' u yantal diijital loobilaj. 

"Mokt'aane' yaan u ts'áak to'on u páajtalil k mu'uk'ankúunsik meyaj k beetik yóok'lal, tumen ku yantal múul meyaj yéetel mola'ayo'ob ti'al u ch'éejsa'al loobilaj", beey tu ya'alaj u jala'achil le noj lu'umo', Mauricio Vila Dosal.

"U jaajile', túumben núukulo'obe' ts'o'ok u k'exik bix u yantal máak yéetel u yéet wíinikil kéen tsikbalnak wa kéen kaambalnak, ba'ale' beyxan, yaan ba'alob ma' jach no'ojantak ku yúuchuli', je'el bix úuchik u chíikpajal loobilaj, u ya'abile', le ku beeta'al ti' ko'olel" tu ya'alaj.

 

También te puede interesar: Yucatán firma convenio con la UE para enfrentar la violencia digital

 

Yóok'lale’ tu jets'aje' u k'áat ka utsil meyajnak ba'al ti'al u kaláanta'al u ko'olelilo'ob le péetlu'uma', ti'al ma' u loobilta'alob, le beetike', tu k'a'aytaje' ts'o'ok u chúunul Red Mexicana de la Lucha contra la Violencia de Género en Internet; le beetike' tu ts'áaj xan u níib óolalil Inai "úuchik u yéeyiko'on ti'al ti'al k beetik le k'a'aytajila', tumen le Reda' yaan u ts'áak u páajtalil k mu'uk'ankúunsik k meyaj". 

Gautier Mignot, máax beetik u éembajadoril Unión Europea ichil u lu'umil México, tu ya'alaje' jaaj, loobilaj ku beeta'al yóok'lal ko'olele' je'el tu'uxake' ku yila'al, ts'o'okole', yéetel uláak' ba'alob je'ex Internete' káaj xan u yantal uláak' u jejeláasil bix u beeta'al loobilaj, le beetike', k'a'anan u ts'a'abal si'ipil kéen beeta'ak ti' Internet wa tu paach, tumen ma' unaj u yantal sajbe'entsil mix tu'ux.

Yéetel mokt’aan beeta’abe’, u jala’achil u lu’umil Yucatán, yéeel Unión Europeae’, yaan u múul meyajtiko’ob, yéetel u nu’ukbesajil Eurosocial yéetel Expertise France, nu’ukbesajo’ob ti’al u ts’aatáanta’al kaaj, ikil u kaxta’al ka ch’éenek u loobilta’al ko’olel ti’ Internet. Yaan u yantal u k’a’abéetkunsa’al u ABCil tak pool kéen yanak díijital loobilaj, je’el bix xan u mu’uk’ankúunsa’al bix u ts’a’abal u yojéelt máak u páajtalilo’obi’, ichil uláak’ ba’alo’ob. Te’el yáax jaatsil meyaje’, kaambanaj kex 150 u túul u aj meyajilo’ob Semujeres, FGE, Poder Judicial, Ceeav, Inaip yéetel SSP yóok’lal jejeláas ba’al yaan u yil yéetel loobilaj tu lu’umil México, América Latina yéetel Europa, ichil uláak’ ba’alob.

Xak'alutskíinsa'an tumen: Sasil Sánchez Chan