Jach ta’aytak u chúunul Noche Blanca tu noj kaajil Jo’; ts’o’ok u láaj líiksa’al ba’al u ti’al

Todo listo para la Noche Blanca este sábado en Mérida: conoce la cartelera
Foto: Rodrigo Díaz Guzmán

Tu jo’oloj ka’ap’éel ja’ab ch’éen u beeta’ale’, le sábado 28 ti’ mayo ku taala’, yaan u beeta’al u yóoxlajuntéenil u cha’anil Noche Blanca, tu noj k’íiwikil Jo’. U tuukulile’, leti’ u tóoch’ta’al its’at, miatsil yéetel jaanalo’ob te’e noj kaajo’.  

Paax, balts’am, boon, óok’ot yéetel uláak’ ba’alo’ob yaan u páajtal u cha’anta’al tu puksi’ik’al le noj kaaja’, ikil u kaxta’al u múuch’ul kajnáalo’ob yéetel ajxíinximbal máako’ob; ba’ale’ ma’ jach je’el bix suuka’an u beeta’al ka’acho’.

Maayat’aane’ yaan xan u yu’ubal te’e cha’ana’; maanal 15 u p’éel e’esajilo’ob yaan u beeta’al yéetel u máasewal t’aanil Yucatán. Tuláakal le je’elobo’ yaan u beeta’al tu paarkeil Ermita, naats’ Instituto Municipal para el Fortalecimiento de la Cultura Maya.

Yaan u xo’okol k’aay tuukulo’ob, yaan u k’a’ayal rap, yaan u beeta’al jejeláas báaxalo’ob je’el bix k’aybuul, ichil uláak’ ba’alo’ob; beyxan yaan u beeta’al u ye’esajil maaya najo’ob. Tukulta’ane’ yaan u láaj ts’o’okol ba’al kex chúumuk áak’ab.

 

También te puede interesar: Todo listo para la Noche Blanca este sábado en Mérida: conoce la cartelera

 

Ichil balts’am kun páajtal u cha’antale’ ti’ yaan Campocorto beeta’an tumen El Círculo Teatro; La última carta beeta’an tumen Rodrigo Pinzón; ¡Uy, el apocalipsis y yo con estos pelos! beeta’an tumen José Ramón Enríquez yéetel Edipo. Apuntes de una ceguera beeta’an tumen u múcuh’il Marfil Teatro.

Yóok’lal óok’ote’ yaan u páajtal u cha’anta’al Amapolas: Suspiros de la libertad, beeta’an tumen u múuch’il Materia en Movimiento; Noche de flamenco, beeta’an tumen u aj-óok’otilo’ob “La Comino” yéetel clásicos orientales, jo’olbesa’an tumen Azul Alonzo.

Beey túuno’, yóok’lal paaxe’ yaan u páajtal u yu’ubal Jazz Sensitive; Grupo Censurado; Liberarios; Valeria Jasso; Muziek Grand Band yéetel yukatekoil paax ich maayat’aan.  

Ti’al mejen paalale’, yaan u beeta’al e’esajilo’ob xan: Somos muy titerechéveres, beeta’an tumen u múuch’il Titeradas; Solsticio de verano, balts’am beet’aan tumen u múuch’il Luciérnagas de la Oscuridad; El amigo más fiel, beeta’an tumen u múuch’il La Camarita, ichil uláak’o’ob.  

Máax jo’olbesik Cultura tu Ayuntamientoil Jo’, Irving Berlín Villafaña, tu ya’alaj páayt’anta’an ti’al u táakpajal te’e cha’ana’ Cuba yéetel Perú, le beetike’ yaan u táakpajal u múuch’il Grupo Síntesis; yéetel Los Mirlos. 

Te’e áak’abo’ yaan u táakpajal 71 u p’éel kúuchilo’ob; 10 paarkes; ka’ap’éel kúuchil balts’am; 13 u p’éel fooros; 7 kúuchil e’esajil; 18 gáaleryas; 21 u p’éel káafe, baar yéetel kúuchilo’ob janal.

Xak'alutskíinsa'an tumen: Sasil Sánchez Chan