Walkil ka’ap’éel p’isk’iino’obe’, tu súutukil u chúunsa’al Expo Feria Ganadera de Escárcega, máax jo’olbesik ka’ach Unión Ganadera Regional, Omar Arjona Ceballos, tu tsikbaltaj yéetel priistail jpat a’almajt’aan, Pedro Armentía López, je’el u jóok’olo’ob ti’ u múuch’kabil Revolucionario Institucional (PRI) wa ka k’uchuk jóok’sbil Carlos Miguel Aysa González, máax tu beetaj ka’ach u jala’achil.
Walkil túun k’aaba’inta’ab Aysa beey u éembajadoril México tu noj lu’umil República Dominicana, ajmeyajo’obe’ tu beetajo’ob ba’ax tu ya’alo’ob, le beetik kex 250 ti’ leti’obe’ tu p’atajo’ob PRI.
“Mix juntéen chíikbesa’ako’on PRI, wa ma’ k’a’abéeto’on ti’obe’ mina’an túun mix ba’al kbeet te’ela’”, tu ya’alaj exclamó Arjona Ceballos, máax xan tu ya’alaje’ “ts’o’ok u p’áatal ma’ keet ba’ax ktukultiki’, leti’obe’ ku beetiko’ob ba’ax u k’áato’ob, ts’o’okole’ mix táan u yáantiko’ob meyajnáalo’ob, mantats’ beyo’, unaj k-kaxtik ba’ax no’oja’an kti’al”, tu tsikbaltaj.
También te puede interesar: Al menos 250 productores agropecuarios renuncian al PRI en Campeche
Máaxo’ob tu jets’aj u jóok’o’olob ti’ le múuch’kabilo’, u máakilo’ob le péetlu’umo’, ichilo’ob yaan éejidal jkomiso’ob yéetel u jo’olpóopilo’ob méek’tankaajo’ob, máaxo’ob táakano’ob ichil u múuch’il máako’ob tséentik wakax yéetel ajpaak’alo’obi’, ba’ale’ máax jo’olbesik múuch’e’ tu ya’alaj yaan u yantal uláak’ máako’ob yaan u p’atiko’ob PRI, “ti’ lalaj méek’tankaaje’ beey kun úuchulo’, ma’ táan u páajtal kp’áatal tu’ux p’ata’abo’on chéen beey te’el tséeliko’”, tu ya’alaj.
Beyxan, tu tsikbaltaje’ le ba’ax ku beetiko’oba’ yaan u chíikpajal ichil u k’ajla’ayil PRI, tumen tu paachil k’iine’ yaan u yilko’ob wa je’el u suuto’obe’, wa ma’e’, ku beetiko’ob jump’éel túumben múuch’kabil, “jáalk’ab yanik máak ti’al u jets’ik u táakpajal ich múuch’ tu’ux ku yu’ubik ma’alob u ti’al”, tu tsikbaltaj, ba’ale’ tu ya’alaj walkila’, ma’ táan u tukultiko’ob u yokolo’ob ti’ uláak’ yaanal múuch’il, tumen beora’ nuka’aj u yilo’ob bix yanaik ba’al, u tukulto’ob yéetel “u cha’ob u máan” ba’ax ucha’an, tumen tu ya’alaje’ táan u meyajo’ob “je’el bix suuka’an u beetiko’obi’”.
Luis García Hernández, u xno’oj k’abil meyaj PRI te’e baantao’, tu ya’alaje’ u p’a’atal múuch’ tumen le jaats máako’oba’ táanili’ u páa’ta’al ka úuchuk, tumen beey k’a’ata’ab ka úuchuk tumen Carlos Miguel Aysa González, máax beetik u éembajadoril México tu lu’umil República Dominicana, tumen juntúul ti’ máaxo’ob beet u péek Arjona Ceballos.
Beey túuno’, táan u tukulta’ale’, te’el k’iino’ob ku taala’ yaan xan u p’a’atal múuch’ tumen uláak’ jun jaats máako’ob ti’ u méek’tankaajil Carmen, máaxo’ob jo’olbesa’anob tumen Luis Ramón Peralta May, máax tu beetaj u jpat a’almajt’aanil LXII Legislatura ti’ u péetlu’umil Kaanpech.
Xak'alutskíinsa'an tumen: Sasil Sánchez Chan
