Úuchik u yantal líik’sajil t’aan tuemn u ajmeyajilo’ob u Ayuntamientoil Kaanpech, aktáan u kúuchil Instituto de Seguridad y Servicios Sociales para los Trabajadores del Estado de Campeche (Issstecam), Fernando Cabrera Castillo, máax chíikbesik kex mil 600 u túul máak táaka’an te’el síindikaatóo’ tu ya’alaje’, kex táan u bo’otiko’ob u kuuotasil u Alcaldíail Kaanpeche’, le mola’ayo’ ma’ u yóot u ts’áaj u páajtalil ti’ob u k’áatiko’ob páaybil taak’in ti’al u k’a’abéetkunsiko’ob ti’ ba’ax k’a’abéet ti’ob. Ajmeyajo’ob xan ti’ u mola’ayil jala’ache’ tu ya’alajob láayli’ beey úucha’an ti’ob, ma’ ts’a’abak u páajtalil ti’obi’.
Tu joolnajil le kúuchilo’, tu yóotaj u páayko’ob taak’in, tumen unaj u páajtal u beetiko’ob je’el bix táaka’ano’ob te’el síindikaatóo, ba’ale’ juntúul u xmeyajil Issstecame’ tu ya’alaj “walkila’ ma’ táan u ts’a’abal taak’in majáantbil, ti’ mix máak, mix ti’al u ajmeyajilo’ob kaaj mix ti’al u ajmeyajilo’ob péetlu’um, le beetike’ unaj u páa’tiko’ob tak kéen ka’a a’alak je’el u béeytal u beetiko’ob”, a’alabti’ob.
También te puede interesar: Issstecam suspende créditos a trabajadores municipales y estatales
Beey túuno’, Cabrera Castillo tu ya’alaje’, ts’o’ok kex lajunp’éel winal ch’éenek u ts’a’abal taak’in páaybil, ka’aj k’exa’ab u yuumilo’ob ku meyaj te’el mola’ayo’, ba’ale’ ka’alikile’ leti’obe’ láayli’ u bo’otiko’ob kuuotas, lalaj kiinse k’iino’ob; leti’obe’ ku tukultiko’obe’ yaan ba’ax jela’an ti’ le ba’ax ku ya’alal ti’ob, “chéen táan u beeta’al tumen U Jala’achil le Péetlu’umo’ tumen yaan ti’ob le taak’in táan kbo’otiko’, unaj u yáantiko’ob tumen to’one’ kk’áatik páaybil le taak’ino’ tumen k’a’abéet”, tu tsikbaltaj.
Ajmeyajo’obe’ tu ya’alajo’obe’ chéen wa jaytúul máax ti’ ku ts’a’abal majáantbil le taak’ino’, tumen uts u biinsikubáaj yéetel wa máax te’el mola’ayo’, tumen ti’ u jeelo’obo’ ma’ ts’a’abak mix u páajtalil u much’ikubáajo’ob yéetel máax jo’olbesik Issstecam, Manuel Enrique Pino Castilla, máax ti’ ts’o’ok u k’áata’al ka u jóok’s u súutukil u tsikbal yéetleo’ob, ti’al u tsolik ba’axten ma’ táan u ts’a’abal páaybil le taak’ino’.
Beey túuno’, máax jo’olbesik múuch’kabil Tres Poderes, José del Carmen Urueta Moha, ma’ xan u ya’al jach mix ba’al ti’ ba’ax ku tukultik yóok’lal le ba’ax táan u yúuchula’, ba’ale’ ajmeyajo’obe’ ku ya’aliko’obe’ ma’ táan u t’aan tumen ma’ uts u taal ti’, tumen u k’áat ka uts pakta’ak tumen u mola’ayil jala’ach ti’ le péetlu’umo’.
Juntúul u ajmeyajil Secretaría de Gobiernoe’, tu ya’alaj leti’obe’ láayli’ xan táan u máansiko’ob le talamila’, tumen ma’ táan u ts’a’abal ti’ob u páajtalil u páayko’ob t’aak’in wa k’a’abéet ti’ob, ba’ale’ ku ya’alike’, káaj u yúuchul ka’aj k’e’ex u ajmeyajilo’ob le mola’ayo’.
Xak'alutskíinsa'an tumen: Sasil Sánchez Chan
