U k’iinil 15 ti’ mayo ti’ u ja’abil 2021e’, macha’ab Andrés Filomeno Mendoza, máax yaan 72 u ja’abil, tumen tu kíinsaj xunáan Reyna N máax yaan ka’ach 34 u ja’abil. Ka’aj ts’o’ok u beeta’al xaak’al tu yoch le máako’ tumen Fiscalía General de Justicia del Estado de México, ka’aj ila’abe’ yaan kex 4 mil 300 u p’éel baakelo’ob u ti’al kex uláak’ 19 u túul ko’olel. Le beetik le máako’ pata’ab u k’aaba’ beey El Caníbal de Atizapán.
Te’e k’iino’oba’ ts’a’ab k’ajóoltbil u cha’anil Caníbal, indignación total, tu’ux ku yesa’al ba’ax u beetmaj. Grau Serra, máax jo’olbesik u meyajil le cha’ana’ tu ya’alaje’: “meyaje’ xáanchaj jayp’éel winalo’ob, ba’ale’ in k’áat ka cha’atak ti’al u péeksik u yóol máak. In k’áat xan in je’elsimbáaj ti’ jump’éel talam ba’al úuch káajak in xak’altik”.
Beyxan tu ya’alaje’ “ka’aj ojéelta’ab Andrés Filomeno Mendoza leti’e’ kiinsaj asab ya’ab wíinik u kíinsmaj tu noj lu’umil Méxicoe’, tjets’aj kbeetik jump’éel u cha’anil ti’al u chíikbesa’al loobilaj ku beeta’al ti’ ko’olel te’e noj lu’uma’, bix u sa’atbesa’alob, bix u beeta’al sexul loobilaj yóok’olo’ob… Le beetike’ ookto’on tuukul, bix úuchik u béeytal u máan 30 ja’abo’ob táan u kíinsa’al ko’olel tumen le máaka’ yéetel ma’ ila’aki’”.
También te puede interesar: 'Caníbal, indignación total', hace visible la violencia que sufren mujeres en México: Realizador
.
Grau Serrae’ tu tsikbaltaje’: “to’one’ k-k’áat ka ila’ak tumen kaaj beyka’aj u nojochil le talamil yaan to’ona’, tumen tuláakalo’on kloobilta’al yóok’lal. Ma’ jumpáay yanik ti’ kaaji’, ts’o’okole’ jo’olpóopobe’ unaj u séebkunsiko’ob meyaj ku beetiko’ob yóok’lal, ti’al u ch’éenel u kíinsa’al ko’olel. Jach t-kaláantaj ba’ax tbeetaj, t-ilaj bix kbeetik ti’al ma’ kka’ap’éelkúunsik u kuuch ko’olel”.
Jo’ojaatsil cha’an
Ti’ le cha’ana’ jóok’sa’an jo’ojaats; lunes 27 ti’ junio ka’aj káaj u máansa’al u ja’ajatsil, yéetel yaan u ts’o’okol tak u yáax k’iinil julio, láas 11:07 áak’ab, ti’ Canal Justicia TV (canal 190 ti’ IZZI, 360 ti’ Dish yéetel 639 ti’ SKY beyxan Totalplay), beyxan Canal de las Estrellas yéetel Canal 22, láas 11:07 horas xan.
Xak'alutskíinsa'an tumen: Sasil Sánchez Chan
