Oochelo’ob ch’a’aban tumen xyukatekail Lizette Abraham yaan u jats’utskíinsik u k’íiwikil u kaajil Kimbilá, tumen ti’ kun ts’a’abil u ye’esajil Deidades del bordado en Kimbilá. Yéetele’ táan u kaxta’al u chíikbesa’al meyaj ku beeta’al tumen u ajchuuyilo’ob le kaajo’. E’esajile’ káaj jo’oljeak 29 ti’ junio.
Oochelo’obe’ ku ye’esik nook’ ku beeta’al te’elo’, tu ya’alaj máax ch’a’ej. Jo’op’éel u meyaj táan u ye’esa’al, u p’iisil lalaj jump’éele’ 1.50 u chowakil yéetel jump’éel meetro u kóochil.
Meyaj beeta’abe’ ch’a’ab u yóol ti’ jo’otúul ajchuuyo’ob yaan tu kaajil Kimbilá, Yucatán, tu’ux yanchaj u bin ti’al u xak’altik bix u beeta’al le nook’o’obo’.
“Tsikbalnajen yéetelo’ob, tu je’ek’abto’ob u joolnajil u yotocho’ob, ka tin wilaje’ yaan chuka’an baatsilo’ob tu kaajil Kimbiláe’ tu’ux tuláakalo’ob ku chuuyo’ob, atantsil, íichantsil u paalilo’ob”, tu ya’alaj.
Le beetik Lizette Abrahame’ tu yóotaj u ye’esik jejeláas ba’alob ti’ u kuxtalo’ob. “oochelo’ob tin beetaj ti’al u ye’esale’, tin beetaj yéetel le ba’axo’ob tu tsikbaltajo’ob teen”, tu ya’alaj.
También te puede interesar: Lizette Abraham inaugurará exposición en Kimbilá, ‘la tierra del bordado’
Táan ich ku chíikpajal te’e oochelo’obo’ múul meyajta’al ichil Lizette Abraham yéetel Ingrid Eli, tumen u ts’ooka’, leti’ máax chúukbesik u wíinkilal le meyajo’, ti’al beyo’ u p’éelilkúunsa’al.
“Kéen u ts’áaj teen táan ich, beeta’an yéetel fiibra de biidryoe’, ts’o’okole’ kin ba’ak’tik yéetel iilóo. Lelo’ yáax jun jaats ti’ le meyajo’; uláak’e’ leti’ kéen búukinta’ak u nook’ le wíinkilal beeta’anobo’, ba’ale’ ku ts’a’abal le beeta’al tumen ajchuuyo’obo’”.
Beey túun u beeta’al oochelo’ob jats’utskíinsa’an yéetel nu’ukulo’ob yaan ba’al u yil yéetel ba’ax tsikbalta’ab tumen máaxo’ob ku meyajtiko’ob chuuy.
“Tsikbalnajen yéetel xunáan Addy, leti’e’ yáax ko’olel máax k’a’abéetkuns u maakináail chuuy tu kaajil Kimbilá. Ku tsikbaltike’, tu yóok’lal le je’elo’, yanchaj ya’abach máak tu kanaj bóordar, tak ka’aj ya’abchaj u yuumil beetik”, tu tsikbaltaj.
Tak walkila’ ma’ jeets’el ba’ax k’iin kéen luk’sa’ak u meyaj tu k’íiwikil le kaajo’. Ba’ale’, u tuukulile’ ka béeyak u mu’uk’ankúunsa’al meyaj ku taal u beeta’al te’elo’.
U meyajil Deidades del bordado en Kimbilá, béeychaj u beeta’al úuchik u yáanta’al tumen u nu’ukbesajil Programa de Estímulo a la Creación y al Desarrollo Artístico (PECDA).
Ts’o’ok maanal 15 ja’abo’ob káajak u meyajta’al oochel tumen Lizette Abraham. Ti’al u páajtal u yojéelta’al uláak’ ba’al yóok’lal u meyaje’, ku béeytal u xak’alta’al u kúuchil Facebook /Lizetteabrahamfotografia.
Xak'alutskíinsa'an tumen: Sasil Sánchez Chan
