Ikil táan u náats’al u k’iinilo’ob je’elile’, yéetel tumen táan u binetik ajmeyajo’obe’, u múuch’kabil Asociación de Hoteles de la Riviera Maya (AHRM) -ikil táan u múul meyaj yéetel Servicio Estatal de Empleo y Capacitación para el Trabajo (Seecat)- yaan u beeta’al tu k’iinil 7, 8 yéetel 9 ti’ julioe’, u k’a’aytajil meyaj yaan tu noj lu’umil México, ti’ Internet, tu’ux yaan u táakpajal 23 u p’éel otelo’ob ti’al u kaxta’al u yuumil 2 mil 200 u p’éel meyajo’ob.
Ti’ k’a’aytajil tsikbal beeta’ab el lunes máanika’, jts’a’ab k’ajóoltbil u nu’ukbesajil Reclutamiento Nacional para el Sector Turismo Quintana Roo 2022, yéetele’ ku tukultiko’ob “je’el u yáantaj ti’al knats’ikbáaj ti’ kaaj, ti’al kts’áaj u yojéelto’ob ba’ax meyajilo’ob yaan, ma’ chéen te’e otelo’obo’, tumen yaan xan u jeelo’ob ti’ kúuchilo’ob janal”, tu ya’alaj Manuel Paredes, máax jo’olbesik AHRM. Leti’e’ tu ya’alaje’ maanal 5 mil meyajo’ob ku kaxta’al u yuumil ti’ jejeláas kúuchilo’ob.
También te puede interesar: Hoteleros de la Riviera Maya ofrecerán más de 2 mil vacantes en feria virtual
Láayli’ te’el súutuko’, u meyajnáalil Trabajo y Previsión Social ti’ u lu’umil Quintana Roo, Catalina Portilla, tu ya’alaje’ tak tu ts’ook xóot’xookil beeta’ab tu ts’ook k’iinil mayo te’e péetlu’umo’, ila’abe’ ts’o’okili’ u ka’a yantal 91 mil 622 u p’éel meyajo’ob, ts’o’okole’ le je’ela’ ku chíikbesik kex u 94.09 por siientoil ti’ tuláakal le beyka’aj meyaj pe’erchaj tu ja’abil 2020, tumen p’áat mina’an 97 mil 381 u p’éelal. Ba’ale’ náak beyka’ajo’ tumen ya’abach kajnáalo’obe’ suunaj tu kaajal ka’aj káaj pak’be’en k’oja’anil, ts’o’okole’ ma’ suunajo’obi’, le beetik walkila’ táan u binetik máak ti’al meyaj.
Le beetik tukulta’ab u beeta’al le k’a’aytajila’ ti’ Internet, ti’al u kaxta’al máako’ob ti’ uláak’ u péetlu’umil México, máaxo’ob ti’ ku k’áata’al ka yanak u k’exik tu’ux kaja’ano’ob wa ku ts’a’abal le meyaj ti’obo’. U bo’olil mola’ayobe’ jejeláas u tojol, yaane’ ku káajal ti’ u jach p’íitil jets’a’an ti’ a’almajt’aan, beyxan ku ts’a’abal u préestasyonesil, ku biinsa’al yéetel ku suta’al máak, ku ts’a’abal u yo’och, baalées ti’al maan, ka’ansajil, u xookil íingles, u nu’ukil u tséentikubáaj máak beyxan siikolojikáa áantaj yéetel u páajtalil u bin u ka’antal u meyaj máak. Yaan xan u jeelo’obe’ ku ts’áako’ob áantaj ti’al u manik u yotoch máak.
Máax u k’áat u yojéelt uláak’ ba’ale’, ku páajtal u xak’altiko’ob u kúuchil Facebook (@SNEQuintanaRoo), Twitter (@SNE_QUINTANAROO), u kúuchil Internet le mola’ayo’, wa u túuxta’al ts’íib tu WhatsAppil 983 212 2827. U k’áatchi’il máake’ yaan u beeta’al ti’ bíideoyamaadáa. Ichil meyajo’ob yaane’ ti’ yaan ti’al máaxo’ob beetik janalo’ob, steward, aj-áantaj beet janal, u kaláanta’al nikte’ob, ichil uláak’o’ob.
Xak'alutskíinsa'an tumen: Sasil Sánchez Chan
