de

del

Yukatekoil cha’ane’, yaan u chíikbesik máaxo’ob uts tu yich skateboarding tu kaajil Jo’

Cortometraje yucateco visualizará el mundo del skateboarding en Mérida
Foto: MKOF

Cha’an ku beeta’al tumen jyukatekoile’ ku kaxtik u chíikbesik máaxo’ob uts tu t’aan u beetiko’ob skateboarding, ba’ale’ ti’al u ts’o’oksa’ale’ táan u kaxta’al áantaj, ti’al u chúukpajal taak’in k’a’abéet u ti’al táabsajil.

Meyaje’ ku kaxtik u ye’esik bix beeta’al depoorte suuk u yila’al ti’ noj kaajo’ob, je’el bix xan jejeláas jela’an tuukulo’ob yaan yóok’ol máaxo’ob beetik, beyxan talamo’ob ku máansiko’ob, tumen mina’an u no’ojan kúuchil ti’al u jalkubáajo’ob te’e noj kaajo’obo’.

“Le deportee je’ela’ ku tejik ba’al: síij chéen beey te’e bejo’obo’, le beetike’, ti’ xaan p’aatali’”, tu ya’alaj Itto Muñoz Carrillo, máax jo’olbesik u beeta’al cha’an.

Te’e ja’aba’ ila’ab u yáax táakbesa’al tu keetil Juegos Olímpicos. Le je’ela’ ts’o’ok túun u beetik u yantal uláak’ máak, paalal, xch’úupalal yéetel táankelemo’ob, u k’áat u kano’ob; ts’o’okole’ jujump’íitil u yila’al, tumen máaxo’ob ts’o’ok u chan xáantal jo’op’ol u beetiko’obe’, bix u bin u k’éexel tuukulo’ob jets’a’an yóok’olo’ob, tu tsikbaltaj. 

 

También te puede interesar: Cortometraje yucateco visualizará el mundo del skateboarding en Mérida

 

Ba’ale’, kex beyo’, tu ya’alaj tu noj kaajil Jo’e’, láayli’ yaan ba’alob unaj u beeta’al: ma’ chuka’an áantaj ti’al máax beetik, mina’an u kúuchil u beeta’al, mix tukulta’an tu beelo’obi’, ts’o’okole’ mina’an xan tu’ux u beeta’al éentrenamientos.

Muñoz Carrilloe’ tu tsikbaltaj táan u kaxta’al u taak’inil ti’al u ts’o’oksa’al le meyaja’.

U tuukulile’, ka béeyak u ye’esa’al bix úuchik u káajal u beeta’al skateboarding ich noj kaaj, beyxan bix úuchik u mu’uk’anchajal ti’al u ja’abilo’ob 2000, tumen káaj xan u tsikbalta’al tumen máaxo’ob beetik bix u bin ti’ob yéetel. Leti’ob túune’, yaan u tsikbaltiko’ob ba’ax ts’o’ok u máansiko’ob ka’alikil táan u beetiko’ob skate, ti’ k’íiwiko’ob yaan tu kaajil Jo’: Parque Zoológico del Centenario, Parque de las Américas, Parque Sanjuanistas, Mulsay, Deportivo Kukulkan, Parque de Santiago, ichil uláak’o’ob. Uláak’ ba’ale’, leti’e kun e’esbil bix ka’ach ku tukulta’ale’ chéen ku beeta’al tumen xiib, ba’ale’ walkila’ yaan ya’abach ko’olel uts tu yich.

U paaxile’ ku kaxtik xan u tóoch’tik punk-rock yéetel ska, tumen nuupulo’ob yéetel u k’ajla’ayil le deportea.

Tu ts’ooke’ tu ya’alaje’, wa yaan máax u k’áat áantaj ti’al u beeta’al cha’ane’ ku páajtal u túuxtik ts’íib: [email protected] wa u beeta’al t’aan ti’ 9991213363. 

Xak'alutskíinsa'an tumen: Sasil Sánchez Chan