de

del

Páayt’aan ti’al ka táanilkunsa’ak justiisya ichil u kaajilo’ob Yucatán

Hacen un llamado para asegurar acceso a la justicia en el interior de Yucatán
Foto: Notimex

Ko’olelo’ob ku meyaj ti’al ka chíimpolta’ak u páajtalil wíinike’, ku ya’aliko’obe’ tu méek’tankaajilo’ob u péetlu’umil Yucatáne’ ma’ táan u jecha’al u loobilta’al ko’olel, tu kúulpachile’, jach talam u p’iis óolta’al wa u yantal justiisya, yéetel asab talam u beeta’al tak pool.

Yóok’lal túun le ba’ax ku yúuchula’, Kelly Puc Vázquez, máax chíikbesik u múuch’kabil Violetas del Mayab, tu ya’alaj tu kaajale’, Motul, u p’ekta’al ko’olel yéetel u ye’esik máak u xiibile’ láayli’ jump’éel ba’al jach suuka’an, le beetik u loobilta’al ko’olele’ ma’ táan u chíikpajal, ts’o’okole’ leti’ túune’, ku k’áatik ka k’éexek ba’al.

Tak walkila’, tu ya’alaj, ko’olel ku loobilta’al ti’ le mejen kaajo’obo’, maas je’el u yóotiko’ob p’áatal chéen je’ex yaniko’obo’, ti’al ma’ u tak poolo’ob, tumen ma’ táan u éejentiko’ob u meyaj jala’acho’ob, chéen ba’axe’, tumen ma’ táan u jach chíikbesa’al ba’ax le ku yúuchulo’, mix xan tu ye’esa’al ti’ob u páajtalilo’obi’, le beetike’ ku p’áatalo’ob ich sajbe’entsil.

 

También te puede interesar: Hacen un llamado para asegurar acceso a la justicia en el interior de Yucatán
 

"Le je’ela’ páayt’aan ti’al u ko’olelilo’ob le kaajo’obo’ ti’al u ma’ u xmukultiko’ob mix ba’al”, tu ya’alaj.

Beyxan leti’e’, tu páayt’antaj Fiscalía ti’al u chich meyaj, ti’al u k’ujsik justiisya yiknalo’ob, tumen ya’abach juntéenake’ mix táan u ts’aatáanta’alo’ob, chéen líik’sbil u beeta’al ju’un; te’e múuch’kabil tu’ux ku meyaj Puc Vázquezo’ ma’ béeyak u béeykunsa’al justiisya ti’ mix juntúul ko’olel yaan yiknalo’obi’.

Tu tsolaj Fiscalíae’ ku p’atik ich sajbe’entsil u kuxtal ko’olel wa ma’ tu ts’áaj u si’ipil máax ku loobilaj. 

U múuch’kabil Violetas del Mayab ku k’amik lalaj winale’, ichil 10 tak 15 u p’éel u kaasosil koobilaj, ba’ale’ u ya’abil ko’olele’ ma’ tu yóotik u beetik tak pool, tumen ku yoksa’al saajkil ti’ob.
Beey túuno’, t’aanaj xan Alejandra González, máax chíikbesik Girl Up Resistencia Feminista Yucatán, ti’al u ya’alike’, jach k’a’anan u paktik máak ba’ax ku yúuchul te’e mejen kaajo’obo’ ti’al beyo’ u yila’al ba’ax unaj u beeta’al ti’al u ch’éenel u loobilta’al ko’olel.  

Leti’ xane’ tu tsikbaltaje’, ko’olel yaan te’e méek’tankaajo’obo’ ka’atéen ku loobilta’al tumen yaan ti’ leti’obe’, ti’al ka béeyak u tak poolo’obe’ najmal u náachtalo’ob, ts’o’okole’ tak chéen yóok’lal le je’elo’ talam u ti’alo’ob.

 Xak'alutskíinsa'an tumen: Sasil Sánchez Chan