Tu jo’oloj óoli’ junk’aal k’iino’ob káajak u meyaj kalesáas elektrikas tu noj kaajil Jo’e’, óol talam u yila’al wa táan u bin ch’a’ak utsil, tumen ka’aj káaj u meyaje’ yanili’ ya’abach máak ku máan xíinximbal te’e kaajo’. Kex beyo’, k’a’anan u séeb ts’aatáanta’al ka ts’a’abak uláak’ liisensias ti’al u yantal uláak’ máaxo’ob meyajtik.
“Tuláakal túumben ba’ale’ ku beetik biinsik jayp’éel k’iino’ob ti’al u k’a’amal, ba’ale’ juump’íitil kéen xi’ik kna’atik bix kéen kmeyajtej, ts’o’okole’ ma’alob k-ilik”, beey tu ya’alaj Eduardo Echeverría Ayala, u meyajnáalil Unión de Conductores y Pequeños Propietarios de Carruajes de Yucatán.
“Walkila’ je’el máakalmáake’ táan u k’a’abéetkunsa’al. Kéen máanak u k’iinilo’ob je’elil yéetel xíinximabale’ leti’ kéen k-il wa táan u chan p’atik náajal. Kéen ch’éenek chochobkile’ ti’ kéen k-il wa táan u k’a’amal tu beel, wa ma’”, tu tsikbaltaj.
Beey túuno’, yóok’lal máaxo’ob meyajtik yéetel táakbesa’ano’ob ichil u múuch0kabil Unióne’, tu ya’alaje’ láayli’ beey u tuukulo’ob: leti’obe’ u k’áato’ob múul meyaj yéetel ayuntamiento; chéen páa’taj ku binetik.
También te puede interesar: Necesarias más licencias para conductores de calesas eléctricas: Echeverría Ayala
Beyxan’ unaj u yila’al u jeel liisensias ku ts’a’abal ti’al u yantal uláak’ máax meyajtik kalesáas elektrikas, tu ya’alaj, tumen tak walkila’ chéen wakp’éel ts’a’abani’, le beetike’ ma’ táan u páajtal u k’e’ek’exikubáaj máak ti’al u meyajtik.
Eduardo Echeverría tu ya’alaje’ ma’ u yojel jach bix yanik ba’al yéetel liisensias, ba’ale’ tu ch’a’achitaje’, ti’al máaxo’ob meyajtike’ k’a’anan le ju’uno’ ti’al u séebtal u yantal meyaj yéetel le nu’ukulo’.
Te’e k’iino’oba’ kalesáas elektrikas yéetel le kóola’an tumen tsíimine’ juntakáalili’ u meyajo’ob: kex óoxtéen u k’a’abéetkunsa’al sáansamal.
Beyxan “to’one’ kpáay’tantik múuch’kabilo’ob kaláantik ba’alche’ob ti’al u yáantiko’ob kaalesáas elektrikas yéetel le kóola’an tumen tsíimino’ob, ti’al u yantal u muuk’ ba’ax ts’o’ok u káajsa’al”, tu tsikbaltaj.
Kalesáas elektrikase’ -je’el bix le kóola’an tumen tsíimine’- ku káajal u meyajo’ob láas 11 ja’atskab k’iin, tak láas 11 áak’ab; ku tojoltik 400 pesos u na’akal máak 40 minutos.
Xak'alutskíinsa'an tumen: Sasil Sánchez Chan
