Tu péetlu’umil Yucatáne’, tak tu ts’ook k’iino’ob julioa’, ts’o’ok u xoka’al mil 313 u túul máka ku meyaj ti’ najo’ob, ts’íibta’an u k’aaba’ ichil u nu’ukbesajil Aseguramiento para Personas Trabajadoras del Hogar ku taal u beeta’al tumen Instituto Mexicano del Seguro Social (IMSS), beey úuchik u ts’a’abal k’ajóoltbil tumen Norma Gabriela López Castañeda, máax jo’olbesik u jaats meyajil Incorporación y Recaudación, ti’ u mola’ayil IMSS.
Ti’ k’a’aytajil tsikbal tu beetaj le martes 26 ti’ julio máanika’, tu noj kaajil Jo’e’, xmeyajnáale’ tu ya’alaj ichil le jaytúul máak xoka’ane’, u 41 por siientoe’, ko’olel yéetel u 59 por siientoile’, xiib; u náajalile’ kex 220 pesos.
También te puede interesar: Hombres, 6 de cada 10 afiliados como trabajadores del hogar en Yucatán
Nu’ukbesaj ku taal u beeta’al tumen u mola’ayil IMSSe’ káaj tu ja’abil 2019, ts’o’oke’ te’e yáax ja’abo’ ts’íibta’ab u k’aaba’ maanal 300 ko’olel, tu péetlu’umil Yucatán. “Jach ki’imak k-óol, tumen ts’o’ok u béeytal ktáakbesik le jaats kaajil p’ata’an paachil mantats’o’, ts’o’okole’ ku páajtal u táakbesa’al je’el máaxak ka meyajnak ich u taanaj u jeel máak”, tu ya’alaj Norma Gabriela. Beey túuno’, ichil tuláakal u noj lu’umil Méxicoe’ yaan kex 50 mil máak ts’íibta’an u k’aaba’ te’e nu’ukbesaja’.
Beyxan, tu k’a’ajsaj le 6 ti’ julio máaniko’, u múuch’kabil Comisión de Seguridad Social, ti’ u Cámarail Diputadose’ tu éejentaj patjo’ol meyaj ku kaxtik u jets’ik bix u yúuchul ba’al yéetel ajmeyajo’ob; táan u binetik u tsikbalta’al tu táan pleenóo ti’al u béeytal.
Ernesto Herrera Novelo, máax beetik u meyajnáalil Fomento Económico y Trabajo de Yucatán (SEFOET), tu tsikbaltaj le nu’ukbesajo’ táan u k’exik ba’al tumen táan u yantal kéet kuxtal ichil le meyaj ku beeta’alo’. Tu ya’alaj xane’, le 6 ti’ mayo máaniko’ béeychaj u múul meyajo’ob yéetel ko’olel yaan u mola’ayo’ob, beyxan ko’olelo’ob ku meyajo’ob ti’ naj yéetel uláak’ múuch’kabilo’ob, ti’al u péektsilta’al le nu’ukbesaja’.
Kex tumen le je’ela’ jump’éel nu’ukbesaj táan u túunta’al ti’al u yila’al wa je’el u ch’a’ak bej tu beele’, táan u páa’ta’al ka su’utuk najmal tu táan a’almajt’aan, ti’al beyo’ u beetik uts ti’ tuláakal máax k’amik wa máax meyaj tu mola’ayil wa tu yotoch. Ku páajtal u ts’íibta’al u k’aaba’ ajmeyajo’obe’ ti’ le kúuchil Interneta’: http://www.imss.gob.mx/personas-trabajadoras-hogar.
Xak'alutskíinsa'an tumen: Sasil Sánchez Chan
