Yucatáne’ ku jach chíikpajal ti’ u jeelo’ob tumen jach mu’uk’an yéetel jejeláas máaxo’ob meyajtik miatsil; ti’al túun u béeykunsa’al ka yanak múul meyaje’, beeta’ab u tsool k’aaba’ob máaxo’ob táakano’obi’, le beetike’ ts’o’ok u yantal Red de Agentes Culturales de Yucatán, yéetele’ táan u kaxta’al ka kéet yanak meyaj ti’ máak, ba’ale’ beyxan ba’ax ku páajtal u ye’esal tu táan uláak’ péetlu’umo’ob yéetel noj lu’umo’ob. Meyaje’ táan u péektsilta’al tumen u jala’achil u noj lu’umil Yucatán, ikil u meyaj Secretaría de la Cultura y las Artes (Sedeculta).
Beey túuno’, yéetel nu’ukbesaje’ táan u kaxta’al ka yanak múul meyaj, beyxan u jach ma’alob kaambal máaxo’ob ku péek ichil u ye’esajil balts’am, cha’an, paax yéetel ts’íib.
Yéetel Red beeta’ane’, aj-its’ato’ob yéetel u ajmeyajilo’ob yaan ti’ le 106 u p’éel u méek’tankaajilo’ob Yucatáne’ yaan u páajtal u xak’altiko’ob u jach túumben tsool k’aaba’il yéetel ba’al yaan u yil yéetel páay’tano’ob ku beeta’al te’e péetlu’umo’, tu lu’umil México yéetel táanxel lu’umo’ob´, je’el bix xan jejeláas ba’alob yóok’lal kaambal xook yéetel meyajo’ob, beey úuchik u k’a’ayta’al tu súutukil úuchik u ts’a’abal k’ajóoltbil nu’ukbesaj tu kúuchil Siglo XXI.
También te puede interesar: Con plataforma digital buscan impulsar el sector cultural y artístico en Yucatán
“Chéen kéen a péets’k’a’abte’, je’el máaxak ti’ yóok’ol kaabe’ yaan u páajtal u yojéeltik ba’axo’ob meyajil ku beeta’al tumen máaxo’ob táaka’an te’e Redo’, ts’o’okole’ ma’ talamili’ yéetel séeba’an”, a’alab ti’ jump’éel kóom cha’an.
Loreto Villanueva Trujillo, máax jo’olbesik Sedeculta tu lu’umil Yucatáne’ tu ya’alaj le nu’ukbesaja’ patjo’olta’ab ti’ tsikbalo’ob beeta’ab yéetel kaaj tu ja’abil 2019, ba’ale’ beyxan tumen mantats’ káajak u k’áata’al ti’ tu’ux je’el u páajtal u xak’lta’al uláak’ ba’alob yóok’lal aj-its’ato’ob yéetel u ajmeyajilo’ob miatsil te’e lu’uma’.
Beyxan, tu súutukil ka’aj t’aanal Andrea Herrera López -máax jo’olbesik Titeradas- tu níib óoltaj úuchik u beeta’al le nu’ukbesaja’, ts’o’okole’ ku tukultike’ meyaj ku beeta’al te’e lu’uma’ yaan u chíikpajal tu táan u jeel noj lu’umo’ob yéetel ya’abach máak kun páajtal u yilik.
Tu súutukil úuchik u ts’a’abal k’ajóoltbil Red de Agentes Culturales de Yucatán táakpaj u jala’achil u noj lu’umil Yucatán, Mauricio Vila Dosal, ichil uláak’ máako’ob táaka’ano’ob ichil u meyajil miatsil. Ti’al u páajtal u yojéelta’al uláak’ ba’alo’ob yóok’lal nu’ukbesaje’ ku páajtal u xak’alta’al u kúuchil Internet: redcultural.yucatan.gob.mx/.
Xak'alutskíinsa'an tumen: Sasil Sánchez Chan
