Sáansamal tu noj lu’umil Méxicoe’, ku yantal 17 u túul wíinik ku kíimil tumen ku tsa’ayal ti’ u ts’unusil proostatáa, juntúul maanal ti’ le 16 ko’olel ku kíimil yóok’lal u ts’unusil iim. Le je’ela’ ku yúuchul tumen ma’ táan u kanik u kaláantikubáaj máak, beey tu tsikbaltaj Liliana Alarcón, máax béeychaj u píitjo’oltik u ts’unusil iim, yéetel máax jo’olbesik Salvati Quintana Roo.
“U ts’unusil proostatae’ jump’éel k’oja’an sáansamal u yila’al; ti’al u winalil octubre ku káajal u yu’ubal jejeláas ba’alob yóok’lal u ts’unusil iim, tuláakal ba’al ku ts’a’abal u samal chak boon, ba’ale’ asab ya’ab xiib ku kíimil yóok’lal u ts’unusil proostatáa”, tu yaj óoltaj.
Tu tsikbaltaje’, najmal u ts’a’abal ojéeltbil ti’ kaaj u k’a’ananil u bin xiib yiknal uroologóo ti’al u xak’alta’al bix yaniko’ob, ti’al u tso’olol ti’ob ba’alob unaj u yojéeltiko’ob, je’el bix ba’ax le proostatao’, ba’ax ti’al tu wíinkilal máak, tu’ux yaan yéetel ba’axten k’a’anan u kaláanta’al.
También te puede interesar: Hay más muertes por cáncer de próstata que por cáncer de mama: Salvati QRoo
Estudio ti’al u yila’al bix yanike’ unaj u beeta’al ja’ab man ja’ab kéen u chuk 40 u ja’abil xiib, leti’e’ k’aaba’inta’an antígeno prostático. Ku beeta’al tu k’i’ik’el máak, yéetel kéen ila’ak ba’ax ku yáax chíikpajale’ ku yila’al wa yaan íinfexion ti’ wíinik, wa najmal u beeta’al uláak’ estudios.
“Wa ku chíikpajal wa ba’ax jach ka’anal ti’ le prueebao’, ku yantal u bin máak yiknal uroologóo ti’al u beeta’al uláak’ jump’éel tu’ux ku t’at’alk’a’abta’al u yiit máak… sáansamale’ 17 xiibo’ob ku kíimil yóok’lal ichil tuláakal u noj lu’umil México”, tu ka’a a’alaj.
Beey túuno’, yóok’lal pak’be’en k’oja’ane’ ch’éen u jach ts’aatáanta’al le je’ela’, le beetik ko’olel yéetel xiibe’ ch’éen xan u bin u beeto’ob u estudyosil ti’al u yila’al bix yaniko’ob, ba’ale’ ba’ax ku yúuchul túun walkila’, kéen xi’iko’ob yiknal ts’akyaje’ k’oja’ane’ ts’o’ok u jach okol tu wíinkilal máak, le beetik talam u ts’a’akal.
Ichil Seguro Social, láayli’ u beeta’al meyajo’ob yóok’lal, ba’ale’ yaan tu’uxe’ k’as xanchaja’an u k’ujsa’al ts’aak, ka’alikil uláak’ meyajo’ob, je’el bix le ku beeta’al UNEME Dedicam tu’ux ku ts’aatáanta’al u yojéelta’al wa tsaayal ti’ máak u ts’unusil iim, ba’ale’ walkila’ nu’ukulo’ob ku meyaj u ti’ale’ yaan k’aschaja’ani’.
“Walkila’ je’elsa’an u ts’aataáanta’al wíinik máax ti’ tsaayal u ts’unusil iim yéetel proostatáa, tumen yaan ya’abach ko’olele’ láayli’ sajak u k’uchul tu kúuchil ts’akyaj yóok’lal u k’oja’anil Covid-19, le beetike’, kex láayli’ yaan u ts’aakil, u óoperasyonil, yéetel uláak’ ba’ale’, ku beeta’al ba’ale’ ich saajkil”, tu tsikbaltaj.
Xak'alutskíinsa'an tumen: Sasil Sánchez Chan
