Le 31 ti’ agosto ku náats’ala’ leti’ kéen káajak u máan u kiis buuts’il u máan máak ich kaaj, ba’ale’ dée áak’ab, tu noj kaajil Jo’, beey úuchik u k’a’ayta’al tumen u jo’olpóopilo’ob u lu’umil Yucatán le martes máanika’.
Ichil ba’ax a’alab tumen máax jo’olbesik Instituto de Movilidad, Desarrollo Urbano y Territorial de Yucatán (Imdut), Rafael Hernández Kotasek, yaan u ts’a’abal meyaj 13 u p’éel u ruutasil kiis buts’, ichil u k’iinil miércoles tak domingo, tu súutukil 11 áak’ab, tak 5 ja’atskab k’iin.
Tu ya’alaje u bo’olil u k’a’abéetkunsik máake’ yaan u beeta’al ba’ale’ yéetel táarjetas; yaan u tojoltik 15 pesos, ba’ale’ xma’ bo’olil kéen ts’a’abak tu winalil septiembre. Ichil le je’elo’obo’, ma’ táaka’an le ku máan péeriferikóo’.
Beyxan, yaan u meyaj u kiis buuts’ilo’ob Frente Único de Trabajadores del Volante (FUTV), le ku máan tu bak’pachil kaaj Va y Ven, láayli’ yaan u meyaj dée áak’ab. Tuláakal xan le kiis buuts’o’obo’ yaan u ts’a’abal ti’ob u nu’ukulil u na’aksa’al t’íinchak balak’ ook.
También te puede interesar: Mérida: Rutas nocturnas para pasajeros iniciarán el 31 de agosto
Hernández Kotaseke’ tu tsolaj yaan ya’abach mola’ayo’ob yéetel kúuchilo’ob tu’ux ku yantal ya’abach máaxo’ob ku meyaj dée áak’ab, ts’o’okole’ leti’ob mu’uk’ankúunsik PIB tu péetlu’umil Yucatán.
Maanal 3 mil u p’éel mola’ayilo’ob náajal ku meyajo’ob dée áak’ab tu noj kaajil Jo’, Kanasín yéetel Umán; kex 22 mil u túul máak ku meyajo’ob dée áak’ab yéetel kex 57 mil xa’ak’a’an u súutukil u meyajo’ob, beey úuchik u chíikpajal ichil Encuesta Nacional de Ocupación y Empleo (ENOE), beeta’ab tumen Instituto Nacional de Estadística e Historia (Inegi).
Yóok’lal túun u k’a’abe’etile’, yanchaj u beeta’al le meyaja’, tu’ux tukulta’an u táakbesa’al 13 u p’éel u bejo’ob tu’ux suuka’an yéetel asab ya’abach máak ku máano’obi’. Bejo’obe’ leti’ le je’elo’oba’: Centro-42 Sur-Cielo alto, Centro-60 Sur, Centro-Canek-Caucel, Centro-Cholul, Centro- Francisco de Montejo-Fraccionamiento Las Américas, Centro-Harbor, Centro-Kanasín, Centro-La Isla, Centro-Tixcacal-Juan Pablo II, Centro-Umán, Circuito Metropolitano Nocturno, Circuito Poniente y Plazas, yéetel Rutas Periférico del Sistema de transporte metropolitano Va y Ven.
Ti’ kun je’elelo’ob yóok’ol u bejil 58 ichil 57 yéetel 59, tu’ux yaan u ts’a’abal u kaajerosil u bo’ota’al u táarjetasil.
Xak'alutskíinsa'an tumen: Sasil Sánchez Chan
