Le sábado 6 ti’ agosto ku taala’ yaan u beeta’al noj múuch’tambal ti’al u ts’a’abal chu’uch mejen paalal; láas 5 tu taal u chíinil k’iin kéen káajak, tu noj kaajil Jo’, tu’ux yaan u chíikbesa’al u k’a’ananil u tséenta’al chaampalo’ob beyo’. Le je’ela’ táan u beeta’al ikil táan u máan Semana Mundial de la Lactancia, káaj tu yáax k’iinil agosto, yéetel yaan u ts’o’okol tak 7 ti’ agosto.
María Fernanda Capetillo Morales, juntúul ti’ le máaxo’ob patjo’olt u kúuchil Lactemos, tu tsolaje’ le múuch’tambal kun beetbila’ yaan xan u beeta’al ti’ u jeel péetlu’umo’ob u lu’umil México, ts’o’okole’ táan u beeta’al ti’al u xoka’al jaytúul ko’olel ts’áak u chu’uch u chaampalo’ob te’e k’iino’oba’. Le xookila’ ja’ab man ja’ab ku beeta’al, ts’o’okole’ tu bin u yila’ale’ táan u ya’abtal.
Leti’ xane’ ku ya’alik te’e k’iino’oba’, táan u bin u k’i’itbesa’al uláak’ ba’alob najmal u yojéelta’al ti’al u na’atale’, u ts’a’abal u chu’uch mejen paalale’ no’oja’an ti’al u tséenta’al tu beel, tumen ka’ache’ ku tukulta’ale’ ma’ táan u tséenta’alo’ob tu beel yóok’lal, ba’ale’ walkila’, tu k’exa’al jela’an tuukulo’ob jeets’el yóok’lal, tumen jump’éel ba’al najmal yéetel uts ti’al le chaampalo’obo’.
También te puede interesar: Visibilizarán lactancia materna con tetada masiva en Mérida
Tu ja’abil 2016 ka’aj yáax beeta’ab le xookila’, te’e ja’abo’ chéen 25 u túul xoka’abij; ba’ale’ ti’al u ja’abil 2021e’, ya’anchaj ko’olel tumen xoka’ab tak 110 u túul ko’oleli’. Beey túuno’, tu ka’ap’éel ja’ab úuchik u beeta’al, ti’al 2017e’, ka’atéenchaj jaytúul na’tsil táakpaji, tumen yanchaj 50 u túulal; ti’al 2018e’, yanchaj 80 u túulal; tu ja’abil 2019e’, leti’e’ ka jach ka’anchaj ko’olel táakpaji tumen yanchaj 120i’, yéetel ti’al u ja’abil 2020e’, k’uch 100 u túulal.
U chíikbesa’al u k’a’ananil u ts’a’abal chu’uch ti’ mejen chaampale’ yaan u beeta’al yéetel le noj múuch’tambala’, ts’o’okole’ ku tukultike’, noj ba’al tumen ma’ juntakáalili’ u yila’al juntúul ko’olel táan u ts’áak chu’uch ti’ u chaampale’, a ke yanak jumúuch’ ko’olel táan u beetik, tumen ya’abach ba’al ku ye’esik le je’elo’.
Buul ja’abe’, tu kúuchil meyaje’, ku ts’a’abal ojéeltbil jejeláas ba’alob yéetel ku beeta’al kaambalo’ob ti’al u péektsila’al u ts’a’abal u chu’uch mejen chaampal, ba’ale’ ti’ le p’iisk’iina’, ku kaxta’al u jach chíikbesa’al le bix ku páajtale’ yéetel ku beeta’al meyajo’ob xma’ bo’olil ti’al u páajtal u táakpajal tuláakal nats’ilo’ob.
Beyxan ti’al u ki’imak óolta’al ko’olel táan u tséentik u chaampale’, yaan u ts’a’abal siibalo’ob, yéetel yaan u beeta’al meyajo’ob, tsikbalo’ob, ichil uláak’ ba’alob, le sabado 6 ti’ agosto ku taala’, láas 5 tu taal u chíinil k’iin, tu kúuchil Auditorio de Los Paseos Henequenes, tu múuch’kajtalil Francisco de Montejo.
Xak'alutskíinsa'an tumen: Sasil Sánchez Chan
