Ikil u kaxta’al u xu’ulsa’al u pu’ulul u xiixel yéetel u yalabil ba’alo’ob ku jóok’sik kaaj u pul tu’ux ma’ no’oja’an tumen ma’ meyajta’an u k’áaxil u ti’ali’, u jala’achil péetlu’ume’, ikil u ts’áamaj meyaj u mola’ayil Secretaría de Ecología y Medio Ambiente (Sema) tu k’a’aytaj u páajtal u xak’alta’al u kúuchil web http://sema.qroo.gob.mx/cartografia/ tu’ux ku chíikpajal jump’éel maapáa ti’al u yila’al k’áaxo’ob je’el u páajtal u meyajta’al ti’al u ts’a’abal kúuchilo’ob ti’al u pu’ulul u yalabil yéetel u xiixel ba’al, wa residuos.
K’áaxo’ob ts’a’abane’ uts yaniko’ob je’el bix jets’a’an ichil NOM-083-SEMARNAT-2003, tu’ux xan jets’a’ab ba’ax najmal u yantal ti’ k’áax ti’al u patjo’olta’al u nu’ukil, u beeta’al, u meyajta’al, u kaláanta’al, u k’a’alal wa u chúukbes’aal ti’al u súutul kúuchil ti’al u pu’ulul u yalabil ba’al.
Ti’al túun u béeytal u beeta’al maapae’, yanchaj u beetea’al xaak’alo’ob tumen Sema, tu’ux k’a’abéetkunsa’ab nu’ukulo’ob yéetel leku p’i’isil, beyxan ku tso’olol k’áaxo’ob, u patjo’olta’al bix u nu’ukil u beta’al kaajo’ob yéetel bix xan u kaláanta’al k’áax, ba’ale’ ti’al u beeta’ale’ ku yáax ch’a’anukta’al bix najmal u kaláanta’al ba’ax bak’pachtik k’áax, yéetel beyka’aj jaay u lu’umil le tu’ux yano’obo’.
También te puede interesar: Definen sitios para disposición final de residuos en Quintana Roo
Beey túuno’, meyaj ku beeta’ale’ yaan xan u táakbesa’al ichil Sistema Estatal de Información Ambiental ti’al u páajtal u yila’al tumen je’el máaxake’. “U nu’ukulilo’ob ti’al u yila’al bix yanik k’áax yéetel lu’ume’ ku ts’áak u páajtalil u meyajta’al tu beel u jejeláasil ba’al ku pu’upul, beyxan ti’al u ts’a’abal yéetel u beeta’al kúuchilo’ob no’ojantak ti’al u pula’al ba’ali’, ti’al beyo’ u ch’éenel u pu’ulul tu’ux ma’ unaji’, tumen beyo’ je’el u chan ch’éenel u beeta’al u yantal éemisionesil ku bin tak te’e iik’o’, tumen leti’e’ yaan ba’al u yil yéetel gases de efecto invernadero”, beey a’alab tumen Sema ti’ k’a’aytajil ts’íib.
Táan u kaláanta’al u beeta’al meyaj tumen Cambio Climático, Residuos de Manejo Especial e Informática ti’ u mola’ayil Sema.
Xak'alutskíinsa'an tumen: Sasil Sánchez Chan
